Կառավարութեան Կազմութիւնը` Ներքին Եւ Արտաքին Կողմերու Առանցքային Առաջնահերթութիւն

0
35

31 օգոստոս 2020-ին, Պերլինի մէջ Լիբանանի դեսպան Մուսթաֆա Ատիպի վարչապետ նշանակումէն ի վեր Լիբանանի կառավարութեան կազմութիւնը առանցքային կարեւորութիւն ստացած է ներքին թէ արտաքին շրջանակներու մէջ, յատկապէս մեկնելով այն մտավախութենէն, թէ թափուր վարչամեքենայի ձգձգումը կրնայ պարարտ հող ստեղծել նոյնինքն Լիբանանի ընդհանուր վարչաձեւի բնոյթին վերանայման: Փաստօրէն, այս հաւանականութիւնը մէկէ աւելի առիթներով շեշտուեցաւ լիբանանեան թէ միջազգային ղեկավարներու կողմէ: Առաջին հերթին ազդանշանը եկած էր Ֆրանսայէն, երբ Լիբանանի «Հոգատար մօր» ղեկավարներ զգուշացուցած էին, թէ Լիբանան կը գահավիժի դէպի անդունդ: Նախագահ Մաքրոն փութացած էր Լիբանան ամէնէն արագ ժամանակամիջոցին փրկելու Լիբանանը անոր սպառնացող ներքին եւ  արտաքին վտանգներէն: Նմանապէս Միացեալ Նահանգներ եւ եւրոպական այլ կազմակերպութեանց ղեկավարներ իրենց մտավախութիւնը արտայայտեցին` իւրաքանչիւրը զօրակցութեան եւ օժանդակութեան ի՛ր ոճը առաջարկելով: Նոյն ծիրին մէջ, Եգիպտոսի արտաքին գործոց նախարարութիւնը վերահաստատեց Լիբանանի զօրակցութեան եւ օժանդակութեան իր պատրաստակամութիւնը` միաժամանակ կոչ ուղղելով լիբանանեան կողմերուն` անյապաղ փութացնելու Լիբանանի ազգային փրկութեան կառավարութեան կազմութիւնը:

Կառավարութեան կազմութեան ուշացումը դուռը լայն բացաւ լիբանանեան կողմերու միջեւ փոխադարձ քննադատութիւններու, որոնց ընթացքին իւրաքանչիւրը փորձեց արդարացնել Լիբանանի փրկութեան ի՛ր վարկածը: Հոգեւոր պետեր եւս անմասն չմնացին եւ իրենց կիրակնօրեայ պատգամին մէջ առանցքային կարեւորութեամբ շեշտեցին կառավարութեան կազմութեան հրամայականը: Այս իմաստով մարոնիներու Ռայի պատրիարք հարց տուաւ, թէ ի՞նչ հանգամանքով համայնք մը կը պահանջէ ու կը պնդէ ունենալ որոշ նախարարութիւն մը` կարծէք ատիկա իր սեփականութիւնը ըլլայ: Յոյն ուղղափառ համայնքի  Էլիաս Աուտէ արքեպիսկոպոսը նոյնպէս  քննադատեց իշխանութեան ղեկավարները` նշելով, թէ, երբ իշխանաւորներ կը վիճին իրենց համայնքային բաժնեկցութեան շուրջ, անդին երկիրը դէպի գահավիժում կ՛ընթանայ:

Այս իմաստով եւս, երեսփոխան Իպրահիմ Քանաան երէկ հարց տուաւ, թէ բաժնեկցութեան հաշուարկներէն ու իրաւասութեանց հակամարտութենէն հեռու` կառավարութեան մը կազմութեան ձախողութեան դիմաց անհրաժեշտ է հարց տալ, թէ մենք կը գտնուինք իշխանութեա՞ն, թէ՞ վարչաձեւի տագնապի դիմաց: «Երկու պարագաներուն ալ, կարելի չէ շարունակել այս մահասփիւռ իրավիճակին մէջ», ընդգծեց Ազգային ազատ հոսանքի ընդհանուր քարտուղար, երեսփոխան Իպրահիմ Քանաան «Թուիթըր»-ի վրայ երէկ կատարած իր գրառումով:

Վարչաձեւի փոփոխութեան մտավախութեան զօրաշարժի մատնած էր նաեւ լիբանանեան կարգ մը կողմեր, որոնք արդէն իսկ պատրաստած են նախատեսուող «Նոր Լիբանան»-ի մը տեսլականը` «Վարչական եւ ելեւմտական ընդլայնուած ապակեդրոնացում», «Քաղաքային Լիբանան» եւ այլ պիտակներու տակ:  Ի տես այս բոլորին,  հանրապետութեան նախագահ զօր. Միշել Աուն  փրկարարի նախաձեռնութեամբ իր կարգին լծուեցաւ քուլիսային աշխուժ ճիգերու` առնչակից կողմերուն հետ:

Նախագահ Աուն միաժամանակ  մնայուն հաղորդակցութեան  մէջ  է ֆրանսացի իր պաշտօնակիցին հետ` հեռաձայնային թէ այս վերջինի ներկայացուցիչին ճամբով: Այս ծիրին մէջ յառաջիկայ օրերը, եթէ ոչ ժամերը, խիստ կարեւոր պիտի ըլլան կառավարութեան կազմութեան «սպիտակ ծուխ»-ը տեսնելու  իմաստով:

LEAVE A REPLY

Please enter your comment!
Please enter your name here