ՊԱՀՊԱՆԵՆՔ  ՆԱՀԱՏԱԿՆԵՐՈՒ  ԱՐԵԱՄԲ ԵՒ ՀԱՒԱՏՔՈՎ  ՁԵՌՔ ԲԵՐՈՒԱԾ ԱՆԿԱԽՈՒԹԻՒՆԸ

0
59

ԱՀԱՐՈՆ ՇԽՐՏԸՄԵԱՆ

Մեր ժողովուրդի  նորագոյն պատմութիւնը կը սկսի  Հայոց դէմ  կազմակերպուած եւ գործադրուած  Ցեղասպանութեամբ,  Սարդարապատի հերոսամարտով եւ  Մայիսեան հանրապետութեան  ծնունդով: Իրականացաւ մեր դարաւոր երազը, երբ ափ մը  հողի վրայ անկախացաւ մեր  հայրենիքը:  Դժբախտաբար   կարճատեւ եղաւ  Մայիսեան հանրապետութեան ճակատագիրը:  Միջազգային եւ տարածաշրջանային  աշխարհաքաղաքական  յեղաշրջումներու  հետեւանքով  Հայաստան  դարձաւ Խորհրդային    ընտանիքի անդամ:  Խորհրդային փրկարար Բ. Հանրապետութեան  ժամանակաշրջանը յատկանշուեցաւ  վերածնունդի եւ վերակազմաւորման  անշեղ  գոյերթով:

21  սեպտեմբեր 1991-ին  Հայաստան վերատիրացաւ  իր անկախութեան:  Եթէ  23  օգոստոս  1990-ին,  Խորհրդային Հայաստանի Գերագոյն Խորհուրդը որդեգրեց Հայաստանի անկախութեան հռչակագիրը,  ապա՝ 21 սեպտեմբեր 1991-ին անկախութեան հանրաքուէի միջոցաւ  հայրենի ժողովուրդը   միաձայնութեամբ  որոշեց դուրս գալ  Խորհրդային Միութեան կազմէն եւ  դառնալ ինքնուրոյն  պետականութիւն:

21  սեպտեմբեր 1991-ի հանրաքուէն համազգային    վճռակամութեան  եւ  հաւաքական կամքի արտայայտութիւն էր:   Նորանկախ Հայաստան  անմիջապէս  մաս կազմեց Միացեալ ԱզգերուԿազմակերպութեան: Անդամակցեցաւ  այլ  միջազգային հեղինակաւոր կառոյցներու: Դարձաւ  գերիշխան  պետութիւն:

Անկախութիւն  ձեռք  բերել որքան ալ դժուար հասանելի  մնայ, զայն պահպանելը  աւելի  լուրջ հրամայականներու առջեւ կը դնէ մեզ բոլորս: Այսօր,  անկախութենէն   29  տարիներ  ետք  հզօր պետականութեան գաղափարախօսութիւնը  պարզապէս  կարգախօս կը մնայ    բազմաթիւ քաղաքական  հոսանքներու  համար:

Ազատ  տնտեսութիւնը  ծայրայեղ հարստացողներու եւ աղքատացողներու խորացող բեւեռ  մը ստեղծած է ժողովուրդին մէջ: Երկրին  տնտեսական եւ ընկերային կայունութիւնը  խորհրդանշող  միջին  դասակարգը  առ այսօր կը մնայ անգոյ: Մենաշնորհեալներու կայսրութիւնը եւ  արմատացած  փտածութիւնը կը  խանգարեն  ժողովրդավար  պետութիւն կառուցելու  ճիգերը:  Այս բոլորը կ’արձանագրենք սրտցաւ լաւատեսութեամբ նայելով ապագային, սխալները սրբագրելու վճռակամութեամբ:

Անկախութեան  տօնը  հայրենիքի նահատակներուն ուխտը վերանորոգելու  եւ սահմանապահ  քաջարի բանակին սխրագործութիւնները վերարժեւորելու օրն է:  Բայց աւելի կարեւորը՝  սթափելու եւ  մեր պետութիւնը գուրգուրալու  օրն է:

Արժեւորենք ու  պահպանենք,  պատերազմի, զրկանքներու,  հազարաւոր նահատակներու արեամբ եւ   հայրենասիրութեան  հաւատքով  ձեռք  բերուած անկախութիւնը: Արժեւորենք ու պահպանենք  մեր  դիրքը  միջազգային ընտանիքին մէջ: Արժեւորենք մեր   անկախ   հանրապետութիւնը,  որպէսզի  կերտենք  իրաւական  հիմքերու  վրայ  յենած ժողովրդավար  Հայաստանը:

Յարգանք բոլոր անոնց, որոնք  կերտեցին  Հայրենիք, Ժողովուրդ, Բանակ  անխախտ  միասնականութիւնը՝ անկախութեան գրաւականը:

Յարգանք բոլոր անոնց, որոնք  ինկան  հայրենիքի  անկախութեան ճանապարհին:

 

LEAVE A REPLY

Please enter your comment!
Please enter your name here