Առնուազն 50 Քոնկրեսականներ Հայոց Ցեղասպանութիւն Եզրը Գործածելու Կոչ Կ՛ընեն Քոնկրեսի Գրադարանին

0
82

ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը տեղեկացնէ, թէ առնուազն 50 քոնկրեսականներ իրենց ձայնը միացուցին Նեւատա նահանգէն դեմոկրատ քոնկրեսական Տինա Թայթըսի, որ Քոնկրեսի գրադարանի ղեկավարութեան յղուած նամակով մը կը պահանջէ, որ այսուհետեւ Հայոց Ցեղասպանութեան անդրադառնան իր իսկական անունով։

Թայթըս իր նամակին մէջ գրած է, թէ Քոնկրեսի գրադարանի ղեկավարութեան կողմէ գործածուող «Հայկական ջարդեր» եզրը ժամանակավրէպ դարձած է յատկապէս, երբ Քոնկրեսը ճանչցած է Հայոց Ցեղասպանութիւնը։

Ինչպէս նախապէս հաղորդած էինք, Միացեալ Նահանգներու Քոնկրեսի գրադարանը, պատասխանելով Ամերիկայի Հայ Դատի յանձնախումբի նամակին՝ Յուլիսին տեղեկացուցած էր, թէ պիտի շարունակէ Հայոց Ցեղասպանութիւն եզրը չգործածել՝ պնդելով, որ այս հարցին մէջ կը հետեւի Միացեալ Նահանգներու նախագահին եւ արտաքին գործոց նախարարութեան օրինակին, հակառակ անոր որ, ինչպէս կառոյցին անունը կը թելադրէ, գրադարանը Քոնկրեսին հովանիին տակ կը գտնուի:

Ամերիկայի Հայ Դատի յանձնախումբի կառավարական հարցերու վարիչ Թերեզա Երիմեան ողջունեց քոնկրեսական Թայթեսի նախաձեռնութիւնը եւ կոչ ըրաւ ամերիկահայութեան, որ այս սխալը սրբագրելու նպատակով միանայ Հայ Դատի սկսած նամակագրութեան արշաւին՝ այցելելով www.anca.org/library կայքէջը:

Աւելի կանուխ, Միացեալ Նահանգներու Քոնկրեսի գրադարանի ղեկավարութեան յղուած նամակով մը Քոնկրեսի Հայկական համախմբումի ղեկավարութները՝ Էտըմ Շիֆ, Կաս Պիլիրաքիս, Ճեքի Սփիր եւ Ֆրենք Փալոն եւս կոչ ըրած էին գրադարանին, որ վերջ դնէ Հայոց Ցեղասպանութեան՝ իբրեւ «Հայկական ջարդեր» անդրադառնալու անընդունելի կեցուածքին, որ կը շարունակուի հակառակ այն իրողութեան, որ Քոնկրեսին երկու տուները՝ Ներկայացուցիչներու տունը եւ Ծերակոյտը, անցեալ տարի յստակօրէն ճանչցան Հայոց Ցեղասպանութիւնը՝ ընդունելով յաջորդաբար թիւ 296 եւ 150 բանաձեւերը:

LEAVE A REPLY

Please enter your comment!
Please enter your name here