Ընկերային-Տնտեսական Ու Առողջապահական Մարզերու Վիճակին Շեշտուող Վատթարացման Լոյսին Տակ. Քուլիսային Շփումներ` Կառավարութեան Կազմութեան Գծով

0
39
In this photo released by Lebanon's official government photographer Dalati Nohra, Lebanese President Michel Aoun, left, meets with Prime Minister-Designate Mustapha Adib, at the presidential palace, in Baabda, east of Beirut, Lebanon, Monday, Sept. 14, 2020. Lebanese officials are holding eleventh-hour negotiations over the formation of a new government, a process which hit snags over the weekend despite a looming deadline to deliver on a promise made to French President Emmanuel Macron. (Dalati Nohra via AP)

Կառավարութեան կազմութեան մարտահրաւէրը երէկ դարձեալ առանցքը կազմեց տարուող քաղաքական ճիգերուն, ուր հրամայական պահանջ դարձած էր նոր կառավարութեան կազմութեան իրագործումը` նախքան փոխանցուած ժամկէտներու աւարտը:  Արդարեւ, նշանակեալ վարչապետ Մուստաֆա Ատիպ, մէկէ աւելի ժամկէտներու միջեւ կը փորձէ կառավարական յարմարագոյն տարազով ներկայանալ լիբանանցիներուն: Այս ծիրին մէջ, մէկ ձեռքին հրաժարականը, միւս ձեռքին կառավարութեան կազմերու տարբեր սեւագիրները` Ատիպ երէկ  յետմիջօրէին, այցելեց Պաապտայի պալատ, առանց սակայն գործնական շօշափելի արդիւնքի, եւ ձեռնունայն վերադարձաւ, նոր ժամկէտ խոստանալով այսօր, շաբաթ կէսօրէ առաջ ժամը 11:00-ին` ներկայացնելու իր ցանկը կամ հրաժարելու:

Նախկին վարչապետ Նեժիպ Միքաթի երէկ երեկոյեան յայտնեց, թէ գիշերուան ընթացքին սերտ ճիգեր եւ խորհրդակցութիւններ պիտի կայանան, եւ եթէ այսօր մերժուի Ատիպի ներկայացնելիք կառավարութեան ցանկը` ան պիտի հրաժարի: Այլ խօսքով, ուրբաթէն շաբաթ լուսցող գիշերուան ընթացքին կայացած մարաթոնային խորհրդակցութիւնները պիտի վճռեն կառավարութեան ճակատագիրը, որուն գծով գրեթէ բոլոր կողմերը համամիտ են դրական արդիւնքի յանգելու, յատկապէս` նախկին վարչապետ Սաատ Հարիրիի նախաձեռնութեան լոյսին տակ:

Նաեւ` Արտաքին Պնդումներ

Լիբանանի կառավարութեան կազմութիւնը հրամայական անհրաժեշտութիւն կը նկատուի նաեւ արտաքին կողմերու համար, որոնք նոյնպէս քուլիսային խորհրդակցութիւններով կ՛ուզեն փութացնել այս խիստ կարեւոր մարտահրաւէրը: Մարտահրաւէր, որ հակառակ պարագային կը սպառնայ նոյնինքն երկրի գոյութեան, ինչպէս զգուշացուցած էր օրին Ֆրանսա: Արդարեւ, Ֆրանսայի նախագահ Էմանուէլ Մաքրոն մնայուն կապի մէջ է լիբանանեան պատկան կողմերու ներկայացուցիչներուն հետ` թախանձագին թելադրելով փութացնել կառավարութեան կազմութիւնը, «նախքան ուշ ըլլալը»: Խորքին մէջ, շրջանային քաղաքական իր հեռանկարներու իրագործման կողքին Ֆրանսա նաեւ ջատագով է Լիբանանի յատկապէս տնտեսական վերականգնումին եւ այս գծով ան խոստացած է «Սետր»-ի թէ այլ ծրագիրներու ֆինանսաւորումը` փոխարէնը  պահանջելով խոստացուած բարեկարգումներուն իրագործումը: Հոսկէ` Ֆրանսայի վճռական կեցուածքը նշանակեալ վարչապետի առաքելութեան դիւրացման գծով եւ անոր մերժողական կեցուածքը Ատիպի հրաժարման հաւանականութեան առնչութեամբ:

Ապրուստի Մարզը` Ահազանգային Վիճակի Մէջ

Տեղական առումով լիբանանցիք զանազան շրջաններու մէջ բողոքի ձայներ բարձրացուցին` պահանջելով հրատապ հարցերու լուծման բանալի քայլ նկատուող կառավարութեան շուտափոյթ կազմութիւնը: Ապրուստի եւ տնտեսական պայմանները հետզհետէ կը վատթարանան` կարգ մը սննդեղէններու սակագիներու յաւելման մասին տեղեկութիւիններու լոյսին տակ:

Ելեւմտական իմաստով Կեդրոնական դրամատան նիւթական զօրակցութեան վերացման «խոստում»-ի լոյսին տակ կարգ մը տնտեսագէտներու «մեկնաբանութիւնները» կը գուժեն լիբանանեան թղթոսկիի յաւելեալ արժեզրկումը: Աւելի՛ն, նշեալ զօրակցութեան վերացման կիրարկումով մտավախութիւնները կը սաստկանան յատկապէս վառելանիւթի եւ ելեկտրածին շարժակներու բաժնեգիներուն գծով, որոնք, ըստ նշեալ տնտեսագէտներուն` կրնան հասնիլ մինչեւ մէկ միլիոն լիբանանեան ոսկիի սահմանը: Կարգ մը վաճառականներ ստիպուած եղած են իրենց կանաչեղէները, բանջարեղէններն ու պտուղները հատավաճառով սպառելու` տրուած ըլլալով, որ լիբանանցիք անկարող են սովորական կշռոյթի սակագինը վճարելու:

«Քորոնա» ժահրի համաճարակին բարձրացող ցուցանիշերը առաւել եւս կը մտահոգեն լիբանանցիները կրթական վերամուտի սեմին: Ծնողներ շուարած են գրենական պիտոյքներու սղաճին եւ առողջապահական վտանգին միջեւ` իրենց զաւակներու կրթական ճակատագիրին գծով:

LEAVE A REPLY

Please enter your comment!
Please enter your name here