«Մեծի Տանն Կիլիկիոյ Կաթողիկոսութեան Միաբանութիւնը Իր Ծառայութիւնը Կը Շարունակէ Հաւատքով Ու Նուիրումով» Կ՛ըսէ Արամ Ա. Կաթողիկոս

0
87

Թեմերուն հետ ունեցած իր առցանց խորհրդակցութիւններուն առընթեր, վեհափառ հայրապետը անցնող օրերու ընթացքին նաեւ առանձին հանդիպումներ ունեցաւ թեմերուն մէջ ծառայող եւ համալսարաններուն մէջ ուսանող միաբան հայրերու հետ:

Վեհափառ հայրապետը վանաբնակ միաբաններուն հետ յաճախակի առիթներով առանձնաբար եւ հաւաքաբար հանդիպումներ կ՛ունենայ, կը լսէ զիրենք, իրենց յանձնուած աշխատանքներուն մասին զեկուցումներ կը ստանայ եւ իր հայրական օրհնութիւնը եւ թելադրութիւնը կը կատարէ անոնց:

Թեմերու մէջ ծառայող միաբաններու հետ ունեցած առցանց զրոյցներու ընթացքին վեհափառ հայրապետը մօտէն տեղեակ դարձաւ անոնց աշխատանքներուն, ինչպէս նաեւ ուսումնական աշխատանքներուն մասին, գնահատեց անոնց հաւատքով ու նուիրումով կատարուող ծառայութիւնը եւ անհրաժեշտ թելադրութիւնները կատարեց: Վեհափառ հայրապետը թելադրեց առաւել թափ տալ անոնց ժողովրդանուէր ծառայութեան` յիշեցնելով, որ հայ հոգեւորականին մեծութիւնը, արժէքն ու արժանիքը միայն ծառայութիւնն է:

Յայտնենք, որ թեմական ծառայութեան մէջ գտնուող միաբաններէն ոմանք նաեւ կ՛ուսանին, ինչպէս նաեւ ամբողջութեամբ ուսման նուիրուած միաբաններ կան Հռոմի, Աւստրալիոյ, Քանատայի եւ Միացեալ Նահանգներու մէջ: Յառաջիկայ կրթական տարեշրջանին նաեւ ուսանողներ պիտի ըլլան Լիբանանի համալսարաններուն մէջ: Յառաջիկայ ամիսներուն ոմանք պիտի վերադառնան թեմական ծառայութենէն, իսկ ուրիշներ պիտի մեկնին:

LEAVE A REPLY

Please enter your comment!
Please enter your name here