ԵԱՀԿ- ԵՒՐՈՊԱԿԱՆ ԽՈՐՀՈՒՐԴԸ- ՖՐԱՆՍԱ  ԱՆՅԱՊԱՂ  ԶԻՆԱԴԱԴԱՐ ԿԸ ՊԱՀԱՆՋԵՆ  –   ՀԱՅ-ԱԶԵՐԻԱԿԱՆ ՍԱՀՄԱՆԻՆ ԱՄՈՂՋ ԵՐԿԱՐՈՒԹԵԱՄԲ  ԼԱՐՈՒԱԾՈՒԹԻՒՆ

0
25

Եւրոպական Խորհուրդի   գլխաւոր  քարտուղար Մարիա Փէյչինովիչ  Պուրիչ  Լեռնային  Ղարաբաղի շուրջ  ընթացող   ռազմական գործողութիւնները  անյապաղ  դադրեցնելու կոչ  ուղղեց  հակամարտութեան կողմերուն:

ԵԱՀԿ Մինսքի   խումբի  համանախագահները   լոյս  ընծայեցին յայտարարութիւն մը, որուն մէջ դիտել կու տան, թէ   Լեռնային Ղարաբաղի հակամարտութեան խաղաղ կարգաւորումը այլընտրանք  չունի:

Ֆրանսայի   արտաքին  գործերու  նախարարութիւնը յայտարարութիւն մը  լոյս ընծայեց Արցախի  հանրապետութեան  վրայ  ազերիական   յարձակումներուն լոյսին տակ:  Յայտարարութեան մէջ   Ֆրանսա խոր մտահոգութիւն կը յայտնէ  Լեռնային  Ղարաբաղի  մէջ ծայր առած  լայնածաւալ   բախումներուն  եւ ռազմական  գործողութիւնները անյապաղ դադրեցնելու կոչ կ’ուղղէ   հակամարտութեան կողմերուն:

Հայաստանի արտաքին  գործոց նախարար Զոհրապ  Մնացականեան մնայուն հաղորդակցութեան  մէջ  կը գտնուի    ԵԱՀԿ-ի Մինսքի   համանախագահներուն, Ռուսիոյ եւ Վրաստանի իր  պաշտօնակիցներուն  հետ:

Հայ-ազերիական  սահմանի ամբողջ երկարութեամբ  կը նկատուի  լարուածութիւն: Թշնամին նաեւ հարուածած է    Գեղարքունիքի մարզի Վարդենիսի  ուղղութեամբ: Սոյն տեղեկութիւնը  հաղորդեց   Միասնական տեղեկատուական կեդրոնի ներկայացուցիչ Արծրուն  Յովհաննիսեանը: « Շէն-շինութիւններու  զգալի  աւերածութիւններ կան  Արցախի առանձին  փոքր բնակավայրերու մէջ,  ինչպէս նաեւ Ստեփանակերտի մէջ: Թշնամին  օգտագործած է  օդային արհեստագիտութեան տեսակաւոր սարքեր». յայտարարեց Յովհաննիսեան

Արցախի   պաշտպանութեան նախարարութիւնը  հաղորդեց, թէ  ծանր  բախումներ  տեղի կ’ունենան սահամանագիծի երկարութեամբ: Պաշտպանութեան   բանակի  յառաջապահ ստորաբաժանումները  յաջողութեամբ   կ’իրականացնեն պատժիչ գործողութիւններ՝   թշնամիին պատճառելով  մարդկային  եւ ռազմա-արհեստագիտական   ծանր կորուստներ:

LEAVE A REPLY

Please enter your comment!
Please enter your name here