ԱԶԳԱՅԻՆ ՎԱՐԺԱՐԱՆՆԵՐՈՒ ԿՐԹԱԿԱՆ 2020-2021 ՏԱՐԵՇՐՋԱՆԻ ԱՌՑԱՆՑ ԴԱՍԱՒԱՆԴՈՒԹԻՒՆՆԵՐԸ ԸՆԹԱՑՔ ԱՌԻՆ

0
46

Երկուշաբթի, 28 Սեպտեմբերի առաւօտեան, կրթական 2020-2021 տարեշրջանը առցանց դասաւանդութիւններով ընթացք առաւ Ազգային չորս վարժարաններու՝ Եղիշէ Մանուկեան Քոլէճի, Ազգային Միացեալ Վարժարանի, Նուպարեան-Խրիմեան Վարժարանի (Թրիփոլի) եւ Յառաջ-Գ. Կիւլպէնկեան Վարժարանի մէջ (Այնճար)։

Դասաւանդութիւններու առաջին հանգրուանին մասնակցեցան միջնակարգի Թ. դասարանի եւ երկրորդականի Ժ.-ԺԲ. դասարանները, յառաջիկայ օրերուն եւ շաբաթներուն, միջնակարգի մնացեալ կարգերու, նախակրթարանի, տարրականի եւ մանկապարտէզի դասարաններու աստիճանական մասնակցութեան ծրագիրով։

Նկատի ունենալով Քորոնայի համաճարակային պայմանները եւ այս իմաստով Լիբանանի կրթութեան նախարարութեան կողմէ ճշդուած համապատասխան օրէնքները, բոլոր դասաւանդութիւնները ցնոր տնօրինութիւն կը կատարուին առցանց, այս նպատակին համար ստեղծուած արհեստագիտական, կրթական եւ մանկավարժական յատուկ ծրագիրներով, որոնք կ’ընդգրկեն հեռավար ուսուցման նորագոյն ձեւեր, աշակերտներու եւ ծնողներու հետ հաղորդակութեան արդիական միջոցներ եւ կրթական աշխատանքին անհրաժեշտ այլ յարմարութիւններ։

Յայտնենք, որ կրթական տարեշրջանի սեմին, անցնող շաբաթ, Ազգային իշխանութեան նորակազմ Ուսումնական Խորհուրդը յատուկ հանդիպումներ ունեցաւ Ազգային չորս վարժարաններու տնօրէնութիւններուն հետ եւ անոնց հետ քննարկեց նոր տարեշրջանի կրթական ծրագիրները հեզասահ եւ արդիւնաւէտ կերպով կատարելու միջոցները։

ԱԶԳԱՅԻՆ ԻՇԽԱՆՈՒԹԵԱՆ

ՈՒՍՈՒՄՆԱԿԱՆ ԽՈՐՀՈՒՐԴ

LEAVE A REPLY

Please enter your comment!
Please enter your name here