Հակառակ Երեւութապէս Տեղքայլի Մթնոլորտին. Կառավարութեան Կազմութեան Գծով Ճիգերը Կը Շարունակուին Մէկէ Աւելի Մակարդակներու Վրայ

0
103

Կառավարութեան կազմութեան գծով ընդհանուր տպաւորութիւնը այն է, որ մօտերս, գէթ յառաջիկայ շաբաթներուն, գործնական քայլեր չեն նախատեսուիր՝ սպասելով Ֆրանսայի
նախագահ Էմանուէլ Մաքրոնի ճշդած ժամկէտի աւարտին՝ նոյեմբերի կէսերուն, երբ արդէն յստակացած կ’ըլլայ ամերիկեան նախագահական ընտրութեան արդիւնքը: Այսուհանդերձ, նշեալ ժամանակէն օգտուելու եւ շուտափոյթ լուծման յանգելու մտադրութեամբ ճիգերը կը շարունակուին մէկի աւելի մակարդակներու վրայ՝ բացայայտօրէն թէ քուլիսներու ետին:

Այս իմաստով հոկտեմբերի վերջերը Ռուսիոյ արտաքին գործոց նախարար Սերկէյ Լաւրովի Լիբանան տալիք այցելութեան նախապատրաստական քայլերու ծիրին մէջ Ռուսիոյ նախագահ Վլատիմիր Փութինի Միջին Արեւելքի հարցերու ներկայացուցիչ Միխայէլ Պոկտանով վերջին 48 ժամերուն տեսակցեցաւ լիբանանցի զանազան պատասխանատուներու հետ, ինչպէս՝ արտաքին գործոց նախարարին, երեսփոխան Թալալ Արսլանի, նախկին երեսփոխան Ուալիտ Ժոմպլաթի եւ այլ պատասխանատուներու հետ:

Ամերիկեան «ճակատ»-ի վրայ, Միացեալ Նահանգներու արտաքին գործոց նախարարի Մերձաւոր Արեւելքի հարցերով օգնական Տէյվիտ Շինքըր իր կարգին կը ծրագրէ մօտիկ ապագային Լիբանան այցելել եւ սեղանի վրայ դնել իր «թելադրանք-պահանջները»: Միաժամանակ, լիբանանեան ծագումով ամերիկացի ծերակուտական Ճէյն Շահին առաջարկ մը ներկայացուցած է Նիւ Հեմբշայր նահանգին մէջ՝ Լիբանանը զերծ պահելու «Սեզար»-ի ամերիկեան պատժամիջոցներէն: Նախընթաց հանդիսացող այս քայլը կրնայ «փրկել» լիբանանցի որոշ պատասխանատուներ՝ անոնց սպառնացող ելեւմտական գայթակղութեանց բացայայտումէն:

Իր կարգին Լիբանանի մէջ Ֆրանսայի դեսպան Պրունօ Ֆուշիէ հրաժեշտի այցելութիւններ տուաւ նախագահ Աունէն ետք՝ խորհրդարանի նախագահ Նեպիհ Պըրրիի եւ այլ պատասխանատուներու: Այս այցելութիւնները առիթ եղան խորհրդակցելու ֆրանսական նախաձեռնութեան յաջողութեան հաւանականութեան ու այս գծով առնուելիք քայլերուն շուրջ:

Արաբական առումով եւս «իրաւարար» ճիգերը կը շարունակուին: Այս գծով ուշագրաւ էր Եգիպտոսի դեսպանին խորհրդակցութիւնները լիբանանցի պատասխանատուներուն հետ, ինչպէս՝ նախկին վարչապետ Թամմամ Սալամ եւ ուրիշներ:

Նաեւ՝  Ներքին Ճակատի Վրայ

Արտաքին կողմերու նշեալ քայլերուն կողքին, հաղորդակցութիւնները կը շարունակուին նաեւ լիբանանեան մակարդակի վրայ, ուր նախագահ զօր. Միշել Աուն չէ դադրեցուցած իր կապերը զանազան կողմերու ներկայացուցիչներուն հետ՝ փորձերով լուծման յարմարագոյն տարազի ենթահողը պատրաստել, նախքան նշեալ ժամկէտներու աւարտը:

Նմանապէս հաղորդակցութիւնները «աշխուժ» են հոգեւոր պետերուն միջեւ: Այս իմաստով հանրապետութեան միւֆթի շէյխ Ապտել Լաթիֆ Տըրիան երէկ խորհրդակցութիւն մը ունեցաւ մարոնիներու Ռայի պատրիարքին հետ, ուր խօսակցութեանց առանցքը կազմեցին երկրի ընդհանուր իրավիճակն ու խնդրայարոյց տեսակէտներու մերձեցման ու համախոհութեան կարելիութիւնները:

LEAVE A REPLY

Please enter your comment!
Please enter your name here