Ամերիկեան Միջնորդութեամբ Եւ ՄԱԿ-ի Հովանաւորութեամբ Մեկնարկեց Հարաւի Ջրային Սահմանագիծը Ճշդելու Բանակցութիւններուն Նախաքայլը

0
107

Երեք տարի քուլիսային խորհրդակցութիւններէ ետք, ի վերջոյ երէկ` հինգշաբթի, 1 հոկտեմբերին, մեկնարկեց Հարաւի ծովային ջուրերու սահմանագիծը ճշդելու  բանակցութիւններուն  առաջին փուլի նախաքայլը:

Իսրայէլի հետ հարաւային ջուրերու սահմանագիծի ճշդման շուրջ բանակցութեանց այս մեկնարկի կարեւորութիւնը կը շեշտուի յատկապէս այն հանգամանքով, որ այդ բանակցութիւնները պիտի յստակացնեն ու հաստատեն Իսրայէլի հետ խնդրայարոյց նաւթի եւ կազի «պլոքներու» լիբանանեան պատկանելիութիւնը:

Այսուհանդերձ, հակառակ նաւթի եւ կազի արդիւնաբերութեան տարիներու սպասումը, չի խափաներ այս քայլը խոստմնալից իրագործում մը նկատելու յուսադրումը, որ տնտեսական ու բարգաւաճումի «կոկիկ» ներդրում կը խոստանայ Լիբանանին` ստեղծելով աշխատանքի բազմաթիւ կարելիութիւններ ու ինքնաբաւ հարստութեան կարեւոր «գանձի» աղբիւր:

Այս գծով նախագահ զօր. Միշել Աուն իր լաւատեսութիւնը յայտնեց` ընդգծելով, որ ինք պիտի գլխաւորէ նշեալ բանակցութիւնները` հիմնուելով Լիբանանի սահմանադրութեան 52-րդ յօդուածի տրամադրութիւններուն վրայ: Այս մասին նախագահական պալատը հաղորդագրութիւն մը հրապարակելով յայտնեց, որ նախագահ Աուն պիտի կազմէ բանակցելու կոչուած խմբակի անձնակազմը եւ պիտի հսկէ բանակցութեանց փուլերուն` մաղթելով, որ ամերիկեան կողմը պարկեշտօրէն շարունակէ իր իրաւարար միջնորդութեան դերը:

Նոյն ծիրին մէջ խորհրդարանի նախագահ Նեպիհ Պըրրի յայտնեց, թէ «իր գործը հոս կ՛աւարտի»:

Պատմական կարեւորութիւն ներկայացնող այս նախաքայլը նմանապէս դրական կերպով գնահատուեցան զանազան կողմերու ղեկավարներուն կողմէ` սպասելով անոր արդիւնաւէտ իրագործման:

LEAVE A REPLY

Please enter your comment!
Please enter your name here