Եւրոպական Միութիւնը 500 Հազար Եուրոյի Չափով Օգնութիւն Պիտի Տրամադրէ Ղարաբաղի Տագնապէն Տուժած Խաղաղ Բնակչութեան

0
278

ԵՐԵՒԱՆ, «Արմէնփրէս».- Լեռնային Ղարաբաղի տագնապի գօտիին մէջ ռազմական գործողութիւններու լոյսին տակ, Եւրոպական Միութիւնը յայտարարեց, որ 500 հազար եուրօ արժողութեամբ արտակարգ մարդասիրական օգնութիւն պիտի յատկացնէ՝ շփման գիծի երկու կողմերուն հակամարտութեան իբրեւ արդիւնք տուժած ամբողջ քաղաքացիական բնակչութեան:

«Թուիթըր»ի իր էջին վրայ այս մասին գրած է Եւրոպական Միութեան ճգնաժամային կառավարման յանձնակատար Եանեզ Լենարչիչ՝ աւելցնելով, որ այդ միջոցներով բնակչութեան պիտի ցուցաբերուի բժշկական օգնութիւն, պիտի տրամադրուին բժշկական սարքեր, ուտելիք եւ այլ անյետաձգելի պարագաներ:

Եանեզ Լենարչիչ դիտել տուաւ, որ Լեռնային Ղարաբաղի տագնապի գօտիին մէջ ռազմական գործողութիւնները արդեն խլած են խաղաղ բնակիչներու կեանքեր։

Ան շեշտեց, որ անհրաժեշտ է պահպանել միջազգային մարդասիրական իրաւունքը եւ ապահովել քաղաքացիական բնակչութեան եւ ենթակառուցուածքներու ու կեանքի պաշտպանութիւնը՝ կոչ ուղղելով անյապաղ դադրեցնել ռազմական գործողութիւնները։ «Եւրոպական Միութիւնը մարդասիրական ֆինանսաւորում կը կատարէ մարդասիրութեան, չէզոքութեան, անկողմնակալութեան եւ անկախութեան մարդասիրական սկզբունքներուն համապատասխան եւ կը գործէ միջազգային կազմակերպութիւններու, ՄԱԿի եւ հասարակական կազմակերպութիւններու միջոցով», իր յայտարարութեան մէջ կ՛ըսէ Լենարչիչ:

LEAVE A REPLY

Please enter your comment!
Please enter your name here