«Հայ Զինուորին» Համար

0
334

ԱՌԻ-Ի ԱՆԴԱՄ

ԱՌԻ-ի տնօրէն խորհուրդի ժողովները, «Քովիտ-19» ժահրի համաճարակին պատճառով, վերջին շրջանին կ՛ընթանային «Զում» հանդիպումներու դրութեամբ: Նախքան ժողովի սկսիլը, զաւակէս կը խնդրէի, որ կապի նախապատրաստական աշխատանքը դասաւորէ: Վերջընթեր ժողովէն ետք, երբ արդէն բռնկած էր Արցախի նորօրեայ գոյամարտը, փակ սենեակէն դուրս եկայ, զաւակս սովորականէն դուրս ինծի հարց տուաւ, թէ այս ծանր ու նուիրական պատերազմական պահուն ի՛նչ որոշեցինք: Ան քիչ թէ շատ գաղափար ունի ԱՌԻ-ի գործունէութեան մասին, գիտէ, որ անիկա ներդրումային ընկերութիւն է, աւելի քան տասը տարիէ ի վեր Արցախի մէջ կ՛իրագործէ շինարարական եւ գիւղատնտեսական ծրագիրներ:

«Հերոս հայ զինուորին համար ի՞նչ որոշեցիք», ան հաշուառուի պէս կրկին հարց տուաւ ինծի:

Ժողովի ընթացքին որոշեր էինք ներդրումային ծրագիրէն, որ ԱՌԻ-ի բնոյթն էր, շեղում կատարել, եւ մեր միջեւ կայացած նուիրահաւաքով կոկիկ գումար մը ղրկել Արցախ: Որոշումը վաւերացուած էր:

Յաջորդ առաւօտեան ես յայտարարեցի իմ նուիրատուութիւնս մեր նախորդ օրուան որոշումը խրախուսելու նպատակով: Երեկոյեան խորհուրդի ընդհանուր ժողովին, որուն կը մասնակցէին ընկերներս եւ ԱՌԻ-ի երիտասարդական կազմը, անոնք ինձմէ աւելի համարձակ եւ աւելի բարձր գումարներով նուիրատուութիւն կատարեցին: Առաւել` խոստացան իրենց շրջապատին մէջ կազմակերպել, այս նպատակին համար նուիրատուութիւններ:

Զաւկիս` ինձմէ պահանջած հաշուետուութիւնը, թէ այս նուիրաբերութեան պահուն «ի՛նչ կատարեցի», եւ ընկերներուս ու մանաւանդ երիտասարդ անդամներու գնահատելի մօտեցումը ինծի պարտադրեցին կրկնապատկել, յայտարարած գումարս` բաւարարելու համար զաւկիս կամքը եւ ընկերներուս հետ համահունչ ըլլալու փափաքս:

Արցախի այս ցաւալի եւ միաժամանակ հպարտառիթ երեւոյթը մեզ կը դնէ պատմական պահանջներու առջեւ. հրաշալի օրինակներ եւ ամրագրումներ կան: Երիտասարդներուն, բանակին անմնացորդ նուիրաբերումը, մեր միասնական մասնակցութիւնը, օտարին չապաւինելու եւ մենք մեզի վստահելու փաստը:

Սփիւռք-հայրենիք միասնականութեամբ եւ միասնական միջոցներով զօրավիգ կանգնինք ԱՐՑԱԽ-ին:

Տանք առաւելագոյնը եւ հաշիւ պահանջենք մենք մեզմէ, որպէսզի ամօթով չմնանք: Հպարտ քալենք սերունդներուն առջեւ, սահմանին վրայ կենաց մահու պայքար մղող երիտասարդներուն առջեւ: Մնանք հպարտ, մեր գլուխները բարձր, ինչպէս հայ զինուորին պահուածքը` առաջնագիծին վրայ:

Փա՛ռք ու պատիւ մեր նահատակներուն:

Փա՛ռք ու պատիւ առաջնագիծին վրայ մարտնչող հայ զինուորին եւ կամաւորին:

Փա՛ռք ու պատիւ մեր նուիրական եւ իմաստուն առաջնորդներուն:

2 հոկտեմբեր 2020

LEAVE A REPLY

Please enter your comment!
Please enter your name here