Արցախին Զօրակցող Լիբանանեան Կեցուածքները Կը Շարունակուին

0
123

Հզօր Լիբանանի համախմբումը երէկ իր շաբաթական հերթական նիստի աւարտին հաղորդագրութիւն մը հրապարակելով դատապարտեց Արցախի դէմ շղթայազերծուած պատերազմը` կոչ ուղղելով անյապաղ դադրեցնելու զայն:

Երեք կէտերէ բաղկացած հաղորդագրութեան մէջ համախմբումը անդրադարձաւ Լիբանանի իրավիճակին` նշելով կացութեան վտանգաւոր ըլլալը եւ պահանջելով դիւրացնել կառավարութեան կազմութիւնը: Հաղորդագրութիւնը նաեւ իր նախանձախնդրութիւնը յայտնեց փտածութեան վերացման եւ բարեկարգումի քայլերու ամբողջացման գծով:

Ժողովականները նաեւ ցաւ յայտնեցին Արցախի մէջ վերսկսած բախումներուն համար` կոչ ուղղելով խաղաղ միջոցներով լուծելու հարցը: Անոնք նաեւ մտավախութիւն յայտնեցին վարձկան ահաբեկիչներու Ազրպէյճան ուղարկման գծով:

Հաղորդագրութիւնը իր զօրակցութիւնը յայտնեց Արցախի հայ բնակչութեան` կոչ ուղղելով յարգելու անոր խաղաղ ու ապահով ապրելու վճռակամութիւնը իր դարաւոր հողին վրայ, «յատկապէս որ այս ժողովուրդը պատմութեան ընթացքին շատ սուղ գին վճարած է ծաւալապաշտ ու այլամերժ ախորժակներու մղումներուն»:

Երեսփոխան Էտի Մաալուֆ հետեւեալ կարծիքը արտայայտած է Լիբանանի Հայ դատի մարմինի դիմատետրի էջին վրայ. «Այս տեսագրութեամբ կու գամ դատապարտելու Ազրպէյճանի գործադրած վայրագ յարձակումները Արցախի եւ Հայաստանի վրայ: Միաժամանակ կ՛ողջունեմ դիմադրող, տոկացող ու իր հողը պաշտպանող հայ ժողովուրդը: Բնականաբար ես դէմ եմ պատերազմի, ոճիրներու եւ աւերի, սակայն երբ մէկը կը յարձակի ժողովուրդի մը արժանապատուութեան, հողին ու հայրենիքին վրայ, չենք կրնար զօրավիգ չկանգնիլ անոր: Կը մաղթեմ, որ հարցերը շուտափոյթ կերպով կը լուծուին երկխօսութեան ճամբով: Կը կրկնեմ` կասկած չունիմ, որ դէպքերու շարունակման պարագային Ազրպէյճանի յարձակումը ձախողութեան պիտի մատնուի: Բոլորս ձեր կողքին ենք, Աստուած ձեզ պահապան:

«Ուաատ» կուսակցութեան նախագահ Ճօ Հոպէյքա գրած է. «Արցախի մէջ շարունակուղ պայքարը ցաւալի է, կը մաղթենք, որ շուտափոյթ լուծում կը գտնուի ու վերջ կը տրուի այս տագնապին, ուր հրթիռարձակումէ, սպանութենէ եւ վրէժխնդրութենէ կը տառապի հայ ժողովուրդը, որ կը կազմէ այդ շրջանի բնակչութեան ջախջախիչ մեծամասնութիւնը: Մենք եւս Լիբանանի մէջ պատմութեան ընթացքին տառապեցանք ցաւալի դէպքերէ եւ քաջ կը գիտակցինք պատերազմներու եւ տագնապներու հետեւանքներուն»:

LEAVE A REPLY

Please enter your comment!
Please enter your name here