«Ժողովուրդի Եւ Անոր Դատին Պաշտպանութեան Համար Համատարած Զօրաշարժի Մթնոլորտ Կը Տիրէ» «Ալ Արապի Ալ Ժատիտ»-ին Կ՛ըսէ Յակոբ Բագրատունի

0
273

«Հայեր կը նկատեն, որ նոր ցեղասպանութեան կ՛ենթարկուին, ինչ որ զիրենք մղեց կամաւորագրուելու հայոց բանակին` պաշտպանելու համար մայր հայրենիքը», յայտնեց ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ` դիտել տալով, որ անոնց այս որոշումը զգացականէն անդին` ամբողջական գիտակցութեամբ տրուած է, քանզի ժողովուրդի եւ անոր դատին պաշտպանութեան համար համատարած զօրաշարժի մթնոլորտ կը տիրէ:

Լոնտոն հրատարակուող «Ալ արապի ալ ժատիտ» («Նոր Արաբը») թերթի համացանցային կայքի լրագրողի հարցումներուն պատասխանելով երեսփոխան Բագրատունի ըսաւ. «Հայաստանի եւ Արցախի վրայ շղթայազերծուած յարձակման դիմադրելու համար կամաւոր այս զինուորագրումը ուղղակի կամ կազմակերպուած չէ, ու այս գծով կոչեր ալ չկան, յատկապէս` Լիբանանի հայկական կուսակցութիւններուն կողմէ, ու արդէն օրինական բանակը կազմ ու պատրաստ է, պէտք ալ չունի կամաւորներու»:

Բագրատունի շեշտեց, որ ներկայիս զօրակցութիւնը կեդրոնացած է բարոյական, քաղաքական ու քարոզչական գործօններուն վրայ, նիւթական զօրակցութեան բացակայութեան, որ հետեւանք է Լիբանանի տնտեսական աղէտալի պայմաններուն: «Այսուհանդերձ մենք կ՛ըմբռնենք մղումը երիտասարդներուն, որոնք ինքնաբերաբար կը մեկնին. փաստօրէն անոնք ցեղասպանութեան սերունդի թոռնիկներն են, եւ ժողովուրդի իրաւունքն է իր ճակատագիրի տնօրինումը», ընդգծեց Բագրատունի` հաստատելով, որ «այսօր իւրաքանչիւր հայ ինքզինք պաշտպանութեան կառոյցի մէկ սիւնը կը նկատէ, ա՛յս է ժողովրդային դիմադրութիւնը, որուն դաստիարակութեան ոգիով հասակ առինք»

LEAVE A REPLY

Please enter your comment!
Please enter your name here