ՄԱՐԴԱՍԻՐԱԿԱՆ ՆՊԱՏԱԿՆԵՐՈՎ  ԺԱՄԱՆԱԿԱՒՈՐ  ԶԻՆԱԴԱԴԱՐ  ՇԱԲԱԹ, 10  ՀՈԿՏԵՄԲԵՐԻ ԿԷՍՕՐՈՒԱՆ ԺԱՄԸ  12-ԷՆ ՍԿՍԵԱԼ

0
57

Հայաստան եւ Ազրպէյճան  ժամանակաւոր  զինադարարի համաձայնութիւն մը կնքեցին, որ պիտի  սկսի  շաբաթ, 10 հոկտեմբեր 2020,   կէսօրուան  ժամը  12-ին, Միջազգային կարմիր խաչին  հովանաւորութեան տակ:

Համաձայնութիւնը գոյացաւ  Ռուսիոյ արտաքին գործոց նախարար Սերկէյ Լաւրովի միջնորդութեամբ, Մոսկուայի մէջ՝ Հայաստանի եւ  Ազրպէյճանի արտաքին գործոց նախարարներ Զօհրապ Մնացականեանի եւ Ճէյհուն Պայրամովի միջեւ աւելի  քան տասը  ժամ երկարող  բանակցութիւններէն   ետք:

Տասը  ժամ երկարող  դռնփակ  խօսակցութիւններու աւարտին, Ռուսիոյ  արտաքին գործոց նախարար Սերկէյ Լաւրով  ընթերցեց,  Հայաստանի, Ազրպէյճանի եւ Ռուսիոյ արտաքին գործոց նախարարներուն անունով   համատեղ յայտարարութիւն մը, ուր կողմերը կը համաձայնին զինադադար հաստատել շաբաթ, 10 հոկտեմբերի  կէսօրուան  ժամը  12-էն սկսեալ՝ մարդասիրական նպատակներով,  դիակներու աճիւնները  ռազմադաշտերէն  դուրս  բերելու,   ռազմագերիները փոխանակելու համար՝ միջազգային Կարմիր խաչին միջնորդութեամբ:

Լաւրովի յայտարարութենէն պարզ կը դառնայ,որ զինադադարի  առաւել յստակ  պայմանները յաւելեալ խորհրդակցութիւններու կը կարօտին տակաւին: Յայտարարութեան մէջ  ընդծուած է, որ հայ եւ ազերի կողմերուն միջեւ   բանակցութիւններու ձեւաչափը ենթակայ  չէ փոփոխութեան: Հակամարտութեան կարգաւորման  բանակցութիւնները պիտի վերսկսին ԵԱՀԿ Մինսքի  խումբի  համախագահներուն միջնորդութեամբ,  հիմնարար սկզբունքներուն հիման վրայ՝ հակամարտութեան  խաղաղ կարգաւորման շուտափոյթ  հասնելու  համար:

Նշենք, թէ  եռակողմ հանդիպումը տեղի ունեցաւ  ուրբաթ, 9 հոկտեմբեր 2020-ին, Մոսկուայի մէջ:

 

LEAVE A REPLY

Please enter your comment!
Please enter your name here