Նամականի. Սիրելի՛ Հայրենակիցներ, Տարբեր Պետութիւններում Ապրող Թանկագի՛ն Քոյրեր Եւ Եղբայրներ

0
189

Սիրելի՛ Հայրենակիցներ, Տարբեր Պետութիւններում Ապրող Թանկագի՛ն  Քոյրեր Եւ Եղբայրներ,

վտանգուած է հող հայրենին, օրեր շարունակ վասն հայրենեաց կենաց-մահու պայքար են մղում հայ զինուորներն ու սպաները, իրենց հուժկու եւ դիպուկ հարուածներով կանխում են թշնամու առաջխաղացումը՝ դրսեւորելով հերոսութեան  եւ անձնազոհութեան հոգեցունց օրինակներ:

Աշխարհասփիւռ հայութիւնը,  մէկ բռունցք դարձած, զինուորագրուել է  Հայոց բանակին, Արցախի պաշտպանութեան սուրբ գործին եւ աշխարհից պահանջում է միջամտել թուրք-ադրբեջանական ահաբեկչական տանդեմի սանձազերծած պատերազմին,  ի դերեւ անել հայկական պատմական հողի, Հայոց երկրորդ պետութեան  նկատմամբ նրանց   նորօսմանական նկրտումները:

Երախտապարտ եմ ձեզ, սիրելի՛ հայրենակիցներ, որ դուք ձեր բնակութեան երկրներում դուրս էք եկել աննահանջ պայքարի եւ օրեր շարունակ ձեր ցոյցերով, միտինգներով, երթերով, արդարացի պահանջներով ուժ էք հաղորդում հայոց Բանակին, մեր Հայրենիքին, մեր չքնաղ Արցախին եւ աշխարհին ցոյց էք տալիս հայի ուժը, տաղանդը եւ համախմբուածութիւնը  Հայրենիքի շուրջ:

Դիմելով ձեզ` սիրելի՛ երիտասարդներ, մեր ազգասէ՛ր եւ հայրենասէ՛ր հայրենակիցներ, խնդրում եմ, որ ձէր ուժն ու  կարողութիւնները, ունեցած կապերն ու հնարաւորութիւնները, տաղանդն ու ազդեցութիւնը  օգտագործէք  եւ բանակցէք ձեր բնակութեան երկրների պետական, նահանգային, քաղաքային իշխանութիւնների հետ,  յորդորէք եւ պահանջէք.

  1. Ճանաչելմիջազգային իրաւունքի հիմնարար սկզբունքներին համապատասխան ինքնորոշուած Արցախի Հանրապետութեան անկախութիւնը,
  2. Օր առաջ հաստատել հրադադար եւ կանգնեցնել սոսկալի ողբերգութիւնը,
  3. Ձեռնարկել միջոցներ՝ զանգուածային լրատուութեան բոլոր միջոցներով միջազգային հանրութեանը տեղեկացնելու դարեր շարունակ իր հողում ապրելու եւ արարելու՝ Արցախիբնակչութեան բնական իրաւունքի մասին, բացատրելու, որ արհեստականօրէն ստեղծուած ադրբեջանը որեւէ իրաւունքչունի Արցախի նկատմամբ, եւ  Արցախը երբեք չի լինելու ադրբեջանի կազմում, յիշեցնելու թուրքիայի կողմից Հայոց ցեղասպանութեան մասին,
  4. Կիրառել տարբեր սանկցիաներ թուրքիայի եւ ադրբեջանի նկատմամբ, նրանցհեռացնելմիջազգային կազմակերպութիւններից, դադարեցնել  երկկողմ եւ բազմակողմ պայմանագրերը, համաձայնագրերը՝ յատկապէս, եթէ դրանք վերաբերում են սպառազինութիւնների վերահսկմանն ու կանխմանը:

Աշխարհը պէտք է իմանայ, որ նրանք պատերազմական յանցագործներ են, որոնք անկարող լինելով յաղթահարել Հայոց անպարտելի բանակին,  մեր հերոս որդիների դիմադրութիւնը եւ խախտելով միջազգային մարդասիրական իրաւունքի նորմերը, հրթիռակոծում են  Ստեփանակերտն ու Շուշին, թիրախ դարձնում քաղաքացիական խաղաղ բնակչութեանը, կանանց ու երեխաներին, ծերերին եւ հիւանդներին, սպանում անմեղ ու անզէն  մարդկանց, փորձում շարունակել իրենց ցեղասպան քաղաքականութիւնը:

Քսանմէկերորդ դարում առաջադէմ աշխարհը պէտք է վճռականօրէն կանխի խաղաղութեան եւ մարդկութեան անվտանգութեան դէմ ուղղուած ծանրագոյն յանցագործութեան՝ ցեղասպանութեան եւ հայրենազրկման կրկնութիւնը, յանուն որի այսօր անձնազոհաբար մարտնչում են հայ զինուորն ու կամաւորը:

Երկիւղածօրէն գլուխ եմ խոնարհում դէպ յաւէրժութիւն գնացած եւ անմահացած մեր հերոսների յիշատակին առջեւ:

Երախտագիտութիւն եմ յայտնում յանուն հայրենիքի մարտնչող հայ զինուորին ու հրամանատարին:

Քրիստոնէական արժէքներ որդեգրած հայ բիբլիական ժողովուրդը յաղթելու է մեզ պարտադրուած հայրենական պատերազմում եւ շարունակելու է յաւերժի ճամփորդի իր արժանապատիւ երթը, քանզի մեր պայքարն արդար է, մենք անպարտ ենք մեր ազգային միասնութեամբ ու հայրենասիրութեամբ, մեր երազանքն իրականացնելու անկոտրում կամքով եւ վճռականութեամբ:

Անխորտակ է Հայոց  ԲԱՆԱԿԸ,

Յաւերժ է  ԱՐՑԱԽԸ,

Հզօր է ՍՓԻՒՌՔԸ,

Սուրբ է ՀԱՅՐԵՆԻՔԸ,

Անպարտ է ՀԱՅԻ ոգին:

Տեղին է յիշեցնել Ամենայն հայոց բանաստեղծ Յովհաննէս Թումանեանի քառատողը՝ գրուած 1918 թուականին.

Բերանն արնոտ Մարդակերը էն անբան

Հազար դարում հազիւ դառաւ Մարդասպան.

Ձեռքերն արնոտ գընում է նա դեռ կ՚ամկար,

Ու հեռու է մինչեւ Մարդը իր ճամփան:

 

Հրանոյշ Յակոբեան

LEAVE A REPLY

Please enter your comment!
Please enter your name here