Ու՞ր  Է Լիբանանցի Ժողովուրդը Այսօր՝ 17 Հոկտեմբեր  2019-էն  Տարի  Մը Ետք

0
57

Ահարոն Շխրտըմեան

Ուղիղ տարի  մը առաջ,  17  հոկտեմբեր  2019-ին,  զայրոյթով եւ  ցասումով  լեցուած  լիբանանցի  ժողովուրդը փողոց  իջաւ, պոռթկաց՝  համայնքային ոստայնններու  մէջ  երկիրը արիւնաքամ  դարձուցած փտած վերնախաւին դէմ: Իշխանութենէն  պահանջեց  անյապաղ հեռացնել  անցնող երեսուն տարիներու  ընթացքին, յաջորդական կառավարութիւններու  վարած սխալ  քաղաքականութիւններուն պատասխանատուները, երկրին  թացն ու չորը թալանած  մենաշնորհեալները,  հաշուետուութեան կանչել  ազգային դրամանիշին դէմ դաւող յանցագործները,  համայնքապետերու  փէշերուն տակ ծուարած փտածութեան խորհրդանիշերը, փոխարէնը՝  ընկերային արդարութեան վրայ յենած,  ժողովրդավար Նոր Լիբանան  մը կերտել յուսահատութեան եզրին  հասած  լիբանանցիներուն:

Տարի  մը ետք, ուղիղ այսօր՝  17  հոկտեմբեր  2020-ին, ոչինչ կատարուած է  ժողովուրդին պահանջներէն:  Ընդհակառակը՝ երկիրը  սնանկացնող, ընկերային, տնտեսական, ելեւմտական տագնապներու մէջ քաղաքացին արիւնաքամ դարձնող  նոյն  աւազակապետերը զիրար  կը բզքտեն   նոր կառավարութեան մէջ  բաժիններ եւ աթոռներ  յափշտակելու նպատակով, սեղաններու տակ, հրապարակային սակարկութիւններու մէջ խրած, նոր պաշտօններ եւ դիրքեր  կորզելու բանակցութիւններ կը  վարեն: Խուլ ականջ ժողովուրդի պահանջներուն  հանդէպ:   Ժողովուրդը  վայր մը, իրենք՝ ուրիշ….: Ո՞վ  է  զբաղողը ժողովուրդին  հրատապ կարիքներով, մտահոգութիւններով…:

Հարցում՝   ինչու՞ լուռ է   ժողովուրդը: Տակաւին ին՞չ կը  սպասէ   տապալելու  երկրին նեխած  համայնքային  համակարգը: Ու՞ր  անհետացան  փոփոխութիւն պահանջող  լիբանանցիները: Ու՞ր մնաց նոր Լիբանան պահանջողներուն արդար ձայնը:  Երկրին  մէջ  քաղաքական, ապահովական, ընկերային, տնտեսական  քաոս  ստեղծելու դուրսէն   հովանաւորուած՝    փուլային  ծրագիրի մը  նախաքայլն էր արդեօ՞ք…:

Եզրակացութիւն՝ այսպէս  ժողովուրդ, այսպիսի՝  ղեկավարութիւն…

LEAVE A REPLY

Please enter your comment!
Please enter your name here