Փոմփէու Հայաստանի Եւ Ատրպէյճանի Արտաքին Գործոց Նախարարները Ուաշինկթըն Հրաւիրեց

0
47

ՈՒԱՇԻՆԿԹԸՆ.- Միացեալ Նահանգներու պետական  քարտուղար Մայք Փոմփէու  յառաջիկայ Ուրբաթ օր մայրաքաղաք Ուաշինկթըն այցելելու հրաւէրներ յղեց Հայաստանի եւ Ազրպէյճանի արտաքին գործոց նախարարներուն, կը հաղորդէ ամերիկեան «Փոլիթիքօ» թերթը:

Ըստ հաղորդուած տեղեկութեան, Փոմփէու նախ պիտի հանդիպի ազրպէյճանցի իր գործընկերոջ՝ Ճէյհուն Պայրամովին, ապա՝ Հայաստանի արտաքին գործոց նախարար Զօհրապ Մնացականեանին հետ:

«Առայժմ, սակայն, յստակ չէ, թէ արդեօք նախատեսուած է հանդիպում նաեւ երեք նախարարներուն միջեւ», կը գրէ թերթը՝ նշելով, թէ Միացեալ Նահանգներու պետական  քարտուղարը ցարդ չէ պատասխանած իրեն գրաւոր  յղուած այս հարցումին:

Սակայն Միացեալ Նահանգներու մէջ Ազրպէյճանի դեսպան Էլին Սուլէյմանով,  հեղինակաւոր թերթին հետ Երկուշաբթի օր կատարած զրոյցին մէջ  չէ բացառած, որ Հայաստանի եւ Ազրպէյճանի արտաքին գործոց նախարարները կրնան  դէմ առ դէմ հանդիպում  մը ունենալ Ուաշինկթընի մէջ:

Ամերիկայի մէջ Հայաստանի դեսպան Վարուժան Ներսէսեան, իր կարգին, բարձր գնահատեց Փոմփէուի վերջին յանդիմանութիւնները Թուրքիոյ  հասցէին՝ Ազրպէյճանին աջակցելուն եւ հակամարտութեան միջամտելուն պատճառով: «Մենք խաղաղ կարգաւորմանն այլընտրանք չենք տեսնում. այն պէտք է լուծուի փոխադարձ զիջումների վրայ». ըսաւ Հայաստանի դեսպանը:

LEAVE A REPLY

Please enter your comment!
Please enter your name here