Ընկ. Սեպուհ Գալփաքեան.« Սաատ Հարիրի՝ Վարչապետ, Այլապէս….»

0
51

«Սաատ Հարիրի` վարչապետ, այլապէս` քաղաքական երկարատեւ անորոշութիւն եւ տնտեսական վերջնական սնանկացում»: Պարտադիր խորհրդակցութիւններու նախօրէին, պատասխանելով երկրի վիճակին վերաբերեալ «Արարատ» օրաթերթի հարցումին, Սոցիալ Դեմոկրատ Հնչակեան Կուսակցութեան Լիբանանի Շրջանի Վարիչ Մարմինի ատենապետ, նախկին պետական երեսփոխան Ընկ. Սեպուհ Գալփաքեան այսպէս բնութագրեց Լիբանանին սպասող ճակատագիրը:

Դիտել տալով, որ ֆրանսական նախաձեռնութիւնը երկրորդ եւ հաւանաբար վերջին առիթ մը տուած է Լիբանանի փրկութեան` Սաատ Հարիրիի վարչապետ վերանշանակումով, Ընկ. Գալփաքեան թելադրեց, որ բոլոր քաղաքական կողմերը իրենց վստահութիւնը յայտնեն  Հարիրիին, որպէսզի օրուան աւարտին երկիրը ունենայ նոր վարչապետ: «Պաապտայի պարտադիր խորհրդակցութիւններուն ընթացքին իւրաքանչիւր կողմ պարտի  ժողովուդին առջեւ ստանձնել իր պատասխանատուութիւնը եւ հրաժարի կուսակցական նեղ հաշիւներէն, որովհետեւ մասնագէտներու կառավարութեան մը կազմութիւնը կը մնայ փրկութեան միակ միջոցը այս փուլին», ըսաւ ան:

Վարիչ Մարմինի ատենապետը ցաւ յայտնեց, որ 17 Հոկտեմբերէն ի վեր քաղաքական  բազմաթիւ  ուժեր չեն ըմբռնած քաղաքական պատգամները եւ տակաւին կը փորձեն իրենց ուղղակի ներկայացուցչութիւնը ապահովել կառավարութեան մէջ, իրենց ստանալիք նախարարական սահմանափակ մասնաբաժինին կարեւորութիւնը գերադասելով երկրին բարեկարգչական ընդհանուր աշխատանքէն: Ընկ. Սեպուհ Գալփաքեան շեշտեց, որ պէտք չէ բաւարարուիլ Սաատ Հարիրիի վարչապետ նշանակումով, այլեւ քաղաքական ուժերը պէտք չէ խոչընդոտեն անոր աշխատանքը, որպէսզի անյապաղ կազմուի գործունեայ կառավարութիւն մը եւ անցնի աշխատանքի: Անոր խօսքով, պարտադիր խորհրդակցութիւններու աւարտին պիտի պարզուի, թէ քաղաքական ուժերն ու անհատ երեսփոխանները ինչ կը նախընտրեն. երկիրը ունենայ միջազգային յարգանք վայելող վարչապե՞տ մը յանձինս Սաատ Հարիրիին, թէ՞ իրենց նեղ շահերէն մեկնելով երկիրը մատնուի քաղաքական երկարատեւ անորոշութեան, որմէ դուրս գալու յոյսի նշոյլ չկայ:

«Այս բոլորը, եթէ մետասաներորդ վայրկեանին պարտադիր խորհրդակութիւնները չյետաձգուին», մաղթեց Ընկ. Գալփաքեան:

 

LEAVE A REPLY

Please enter your comment!
Please enter your name here