Հարիրիի Կատարած Ոչ Պարտադիր Խորհրդակցութիւններուն Լոյսին Տակ. Համախոհութիւն Գոյացաւ Ամէնէն Արագ Ժամանակամիջոցին Կազմելու Մասնագէտներու Կառավարութիւն Եւ Սկսելու Բարեկարգումներու Գործադրութեան

0
146

Վարչապետ Սաատ Հարիրի երէկ կէսօրէ ետք ժամը 1:30-էն մինչեւ երեկոյեան ժամը 6:00 խորհրդարանին մէջ երեսփոխանական պլոքներուն եւ անհատ երեսփոխաններուն հետ կատարեց կառավարութեան կազմութեան ոչ պարտադիր խորհրդակցութիւններ:

Անոնց աւարտին Հարիրի խորհրդարանէն կատարեց յայտարարութիւն մը, որուն մէջ ընդգծեց, թէ պիտի կազմէ մասնագէտներէ բաղկացած կառավարութիւն մը, որ պիտի գործէ ըստ ֆրանսական նախաձեռնութեան բովանդակած բարեկարգումներուն իրագործման:

Հարիրի նշեց, որ կառավարութիւնը վեց ամսուան ժամանակաշրջանի մը կարիք ունի` հասնելու համար իր նպատակին, «իսկ ֆրանսական նախաձեռնութեան ճշդած բարեկարգումներէն ոչ մէկ ձեւով պիտի շեղիմ: Պէտք է ճշդել նպատակները եւ աշխատիլ անոնց գործադրութեան ի խնդիր», հաստատեց ան:

Հարիրի անհրաժեշտ նկատեց բոլորին միջեւ համագործակցութիւնը եւ դրական մօտեցումը` կարենալ վերականգնելու համար վստահութիւնը թէ՛ քաղաքացիին եւ պետութեան միջեւ, եւ թէ՛ պետութեան եւ Միջազգային ընտանիքին:

Հարիրի խորհրդակցութիւնները սկսաւ հանդիպում ունենալով խորհրդարանի նախագահ Նեպիհ Պըրրիի հետ:

Ապա ան ընդունեց նախկին վարչապետ Նեժիպ Միքաթին, որ կոչ ուղղեց կազմելու մասնագէտներու կառավարութիւն մը` անհրաժեշտ նկատելով, որ կառավարութեան կազմը ըլլայ ներդաշնակ կարենալ դիմադրելու համար առկայ մարտահրաւէրներուն:

Նախկին վարչապետ Թամմամ Սալամ Հարիրիի հետ խորհրդակցելէ ետք կոչ ուղղեց` կազմելու փրկութեան կառավարութիւն մը, որ հարկ եղած բարեկարգումներուն գործադրութեան կը ձեռնարկէ:

Սալամ ընդգծեց, որ ինք համոզուած է, թէ Հարիրի` գործակցելով հանրապետութեան նախագահ զօր. Միշել Աունի եւ Պըրրիի հետ, կրնայ շատ բան իրագործել, յատկապէս` երկրին քայքայումը կասեցնել:

Խորհրդարանի փոխնախագահ Էլի Ֆըրզլի Հարիրիի հետ հանդիպելէ ետք ընդգծեց, որ պահանջուածը մասնագէտներու կառավարութիւն մըն է` աւելցնելով, որ նախարարաց խորհուրդին մէջ համագործակցութեան մթնոլորտը կարեւոր է ու անհրաժեշտ:

Ազատագրում եւ բարգաւաճում պլոքին անունով երեսփոխան Անուար Խալիլ կոչ ուղղեց` արագացնելու կառավարութեան կազմութիւնը: Ան պահանջեց, որ կառավարութիւնը ըլլայ մասնագէտներու կառավարութիւն մը եւ անոր հիմնական աշխատանքը ըլլայ բարեկարգումներու գործադրութիւնը:

Հարիրի ընդունեց նաեւ Ազգային ազատ հոսանք կուսակցութեան պլոքը` կուսակցութեան ղեկավար, երեսփոխան Ժըպրան Պասիլի գլխաւորութեամբ:

Հանդիպումէն ետք Պասիլ հաստատեց, որ Հարիրիի հետ անձնական հարցեր չկան` աւելցնելով, թէ իրենք առաւելագոյն չափով դրական տրամադրուած են, եւ իրենց նպատակն է գործադրել ֆրանսական նախաձեռնութեան պարփակած բարեկարգումներու ծրագիրը:

«Մեր իրաւունքն է մտահոգուիլ, սակայն պատրաստ ենք ամբողջական գործակցութեան եւ երկրին քանդումի կասեցման նպատակով գործելու, որպէսզի այս բարդ ու դժուար փուլը շրջանցենք: Մենք ոչ մէկ պահանջ ներկայացուցած ենք եւ կամ պայման ճշդած, բացի անկէ, նախարարներու նշանակման մէկ չափանիշ որդեգրուի», ըսաւ ան:

Պասիլ կոչ ուղղեց` կազմելու մասնագէտներէ եւ քաղաքական անձնաւորութիւններէ բաղկացած կառավարութիւն մը, որուն մէջ նախարարները պէտք է համապատասխան կարողութիւններով օժտուած ըլլան եւ` արագ նուաճումներ գործելու ատակ:

«Կը սպասենք Հարիրիի եւ նախագահ Աունի որդեգրելիք քայլերուն, մնալով առաւելագոյն չափով դրական, ինչպէս նաեւ պատրաստ` ամէն իմաստով զօրակցութեան», ըսաւ Պասիլ:

Լեռնալիբանանի երաշխիք պլոքը իր կարգին հանդիպում մը ունեցաւ Հարիրիի հետ:

Հանդիպումէն ետք, երեսփոխան Մարիօ Աուն յայտնեց, որ վարչապետէն խնդրած են Լեռնալիբանանի իւրայատկութիւնը ի մտի ունենալ` կառավարութեան կազմութեան ընթացքին:

Հարիրի ընդունեց Մուսթաքպալ պլոքը, որուն անունով երեսփոխան Սամիր Ժսըր յայտնեց, որ պլոքը կառավարութեան կազմութեան մանրամասնութիւնները կը վստահի Հարիրիի:

Հաւատարմութիւն դիմադրութեան պլոքին հետ վարչապետ Հարիրիի հանդիպումէն ետք, պլոքի նախագահ, երեսփոխան Մոհամետ Ռաատ յայտնեց, որ իրենք պատրաստ են գործակցելու վարչապետ Հարիրիի հետ:

Ռաատ նշեց, որ վարչապետին առաջարկած են սեղմ կառավարութիւն մը կազմելու ընտրանքին չզօրակցիլ, այլ` 22-24 նախարարներով կառավարութիւն մը կազմել:

Ժողովրդավարական հանդիպում պլոքի նախագահ, երեսփոխան Թայմուր Ժոմպլաթ կոչ ուղղեց` ամէնէն արագ ժամանակամիջոցին կազմելու մասնագէտներէ բաղկացած կառավարութիւն, նաեւ ոմանց հրաւիրեց չարգելակելու կառավարութեան կազմութեան հոլովոյթը:

Երեսփոխան Ժան Օպէյտ յայտնեց, որ Անկախ կեդրոնի պլոքը վարչապետ Հարիրիի հետ հանդիպումին ընթացքին յոյս յայտնած է, որ նոր կառավարութիւնը կազմակերպուած աշխատանք որդեգրէ եւ ատակ անձնաւորութիւններով ներկայանայ` կարենալ բոլոր մակարդակներուն վրայ դիմագրաւելու երկրին սպառնացող մարտահրաւէրները:

Հզօր հանրապետութիւն պլոքի անունով երեսփոխան Ժորժ Ատուան յայտնեց, որ Հարիրիի հետ հանդիպումին ընդգծած են մասնագէտներէ բաղկացած կառավարութեան մը կազմութեան անհրաժեշտութիւնը:

Անկախ երեսփոխան Էտի Տեմիրճեան Հարիրիի հետ ունեցած իր հանդիպումէն ետք յայտնեց, որ ինք շեշտած է դրամատուներուն մէջ հաշիւ ունեցող լիբանանցիներուն գումարները դարձեալ անոնց վերադարձնելու կարեւորութեան անհրաժեշտութիւնը:

Անկախ երեսփոխան Նուհատ Մաշնուք Հարիրիի հետ խորհրդակցելէ ետք մեկնեցաւ` առանց յայտարարութիւններ կատարելու:

Անկախ երեսփոխան Ուսամա Սաատ յայտնեց, որ Լիբանանի մէջ քաղաքական համակարգը նոյնն է, եւ ոչ մէկ փոփոխութիւն արձանագրած է:

Անկախ երեսփոխան Ֆուատ Մախզումի մաղթեց, որ նոր կառավարութիւնը ըլլայ անկախ նախարարներէ բաղկացած կառավարութիւն մը` յուսալով, որ կուսակցութիւնները նախարարները ճշդելու իմաստով միջամտութիւններ չեն կատարեր:

Անկախ երեսփոխան Միշել Տահեր պահանջեց, որ կառավարութիւնը բաղկանայ մասնագէտներէ եւ անոր կազմութիւնը կարելի եղածին չափ արագ ըլլայ:

Անկախ երեսփոխան Շամել Ռուքոզ մաղթեց, որ կառավարութիւնը մասնագէտներէ բաղկանայ եւ անոր տրուին արտակարգ իրաւասութիւններ:

Անկախ երեսփոխան Ժիհատ Սամատ շեշտեց, որ Լիբանան կարիքը ունի փրկութեան կառավարութեան, որուն մէջ բոլորը` առանց բացառութեան, կը ստանձնեն իրենց պատասխանատուութիւնները:

Անկախ երեսփոխան Ժան Թալուզեան հաստատեց, որ նոր կառավարութիւնը պէտք է անյապաղ կազմուի` աւելցնելով, թէ Հարիրիէն պահանջած է կազմել սեղմ կառավարութիւն մը:

LEAVE A REPLY

Please enter your comment!
Please enter your name here