Մնացականեան Արդիւնաւէտ կը  Նկատէ  Փոմփէուի  Հետ Հանդիպումը

0
101

Միացեալ  Նահանգներու  պետական  քարտուղար  Մայք Փոմփէու, Հայաստանի եւ  Ազրպէյճանի արտաքին  գործոց նախարարներ  Զօհրապ Մնացականեանի եւ  Ճէյհուն Պայրամովի հետ  քննարկեց  Լեռնային Ղարաբաղի  հակամարտութեան գօտիին մէջ զինադադար  հաստատելու անհրաժեշտ պայմանները:

Հանդիպումներուն աւարտին, պետական քարտուղարութեան  հրապարակած  հաղորդագրութիւնը կողմերը հրաւիրեց բանակցութիւններու սեղան: Հաղորդագրութիւնը նաեւ  բռնութիւնը դադրեցնելու կոչ ուղղեց   հակամարտութեան կողմերուն:

Փոմփէու  ընդգծեց   իր  քննարկումներուն  ընթացքին  ԵԱՀԿ-ի Մինսկի  համանախագահներու  հովանաւորութեան տակ բովանդակալից բանակցութիւններ սկսելու անհրաժեշտութիւնը՝  Հելսինքիի ուխտի սկզբունքներուն՝  ուժ կամ ուժի սպառնալիք  չգործադրելու,տարածքային ամբողջականութիւնը յարգելու, հաւասար  իրաւունքներու  եւ ժողովուրդներու  ինքնորոշման  իրաւունքին  հիման  վրայ:

Հանդիպումէն ետք,  Մնացականեան արդիւնաւէտ   նկատեց  Փոմփէուի հետ  հանդիպումը:  Ան միաժամանակ դիտել տուաւ, որ  հայկական կողմը  երեք  թշնամիի դէմ կը պայքարի միաժամանակ՝  Ազրպէյճանի, Թուրքիոյ եւ միջազգային ահաբեկիչներու:

Միւս կողմէ,  Մ. Նահանգներու  պետական  քարտուղար  Մայք Փոմփէու  հեռախօսազրոյց մը ունեցաւ   Եւրոպական  Միութեան արտաքին  քաղաքականութեան   բանագնաց    Ժոզէփ Պորելի հետ:  Անոնք արտաքին  ուժերուն  կոչ ըրին զերծ մնալ  Լեռնային Ղարաբաղի գօտիին մէջ  լարուածութիւնը խորացնող  գործողութիւններէն:

LEAVE A REPLY

Please enter your comment!
Please enter your name here