Քոնկրեսական Էտամ Շիֆ Կոչ Ըրաւ Միացեալ Նահանգներուն՝ Ճանչնալու Արցախի Հանրապետութիւնը

0
104

ՈՒԱՇԻՆԿԹԸՆ.- Քալիֆորնիայէն դեմոկրատ քոնկրեսական Ատամ Շիֆ այսօր պաշտօնական յայտարարութեամբ մը կոչ ըրաւ Միացեալ Նահանգներուն՝ ճանչնալու Արցախի Հանրապետութիւնը: Իր խօսքը Քոնկրեսի խօսնակ Նենսի Փելոսիին ուղղելով՝ Շիֆ ըսաւ. «Հանդէս կու գամ յայտարարութեամբ, որովհետեւ առաւել քան չորս շաբաթէ ի վեր Ատրպէյճան եւ Թուրքիա պատերազմ սանձազերծած են Արցախի դէմ՝ ռմբակոծելով քաղաքացիները, եկեղեցիները եւ գործադրելով պատերազմական յանցագործութիւններ»: Շիֆ նկատել տուաւ, որ յարձակումներ ետ մղելու ընթացքին ցարդ աւելի քան 800 հայ զինուորներ եւ տասնեակներով քաղաքացիներ մահացած են, մինչ Արցախի բնակչութեան մեծ մասը ստիպուած եղած է հեռանալու իր բնակավայրերէն եւ դիմագրաւելու կենցաղային մեծ դժուարութիւններ, ձմեռնամուտի այ օրերուն:

Շիֆ յիշեցուց, որ անցնող տասնամեակներուն, Միացեալ Նահանգները հետամուտ եղած է ԵԱՀԿի Մինսկի խմբակի միջոցաւ բանկացութիւններու ճամբով արդար լուծումի մը հանգելու ծրագիրի իրագործման, սակայն Մինսկի խմբակը միշտ դէմ յանդիման գտնուած է Ատրպէյճանի ռազմական միջոցներով լուծումի յանգելու սպառնալիքներուն, ինչպէս նաեւ պարբերաբար զինադադարը խախտելու անոր գործելաձեւին:

Յիշելէ ետք, որ հայութիւնը այսօր դար մը առաջ Օսմանեան կայսրութեան կողմէ գործադրուած ցեղասպանութենէն վերապրած ժառանգորդ է՝ քոնկրեսականը յայտարարեց. «Կարելի չէ արտօնել որ պատմութիւնը ինքզինք կրկնէ: Եթէ Ատրպէյճան եւ Թուրքիա որոշած են պատերազմ սանձազերծել, Միացեալ Նահանգները, Մինսկի խմբակը եւ Միջազգային ընտանիքը պէտք է յստակօրէն ձգտին, որ իրենց այդ քայլը ձախողութեան մատնուի: Իսկ եթէ շարունակեն բռնարարքներու այս ընթացքը, պէտք է ճանչնանք Արցախի Հանրապետութիւնը՝ իբրեւ անկախ երկիր: Այսպիսի քայլով մը զօրաւոր պատգամ մը փոխանցած կ՛ըլլանք՝ ըսելով, որ պիտի չարտօնենք սահմանային վէճերը լուծել քաղաքացիական բնակչութեան դէմ անխտիր եւ ահաւոր ուժի գործադրութեամբ»:

Շիֆ իր խօսքը եզրափակեց՝ ըսելով. «Պէտք է հասկցնել Ալիեւին եւ Էրտողանին, որ այս պատերազմը շարունակելու պարագային, հետեւանքներ պիտի ըլլան: Միացեալ Նահանգները ձեռնածալ պիտի չմնայ»:

LEAVE A REPLY

Please enter your comment!
Please enter your name here