Հայաստանի հարավային սահմանին իրադրությունը վերահսկելի է, հայտնում են ՊՆ-ից

0
53

https://www.azatutyun.am

Հայաստանի հարավային սահմանին իրադրությունը վերահսկելի է, «Ազատությանը» հայտնեցին Պաշտպանության նախարարությունից, այլ մանրամասներ պաշտպանական գերատեսչությունը չհաղորդեց։

Մեղիրում իրավիճակը հանգիստ է, համայնքապետարանի ներկայացուցիչ Մարիամ Ծատրյանի վստահեցմամբ՝ քաղաքն ընդհանուր առմամբ բնականոն կյանքով է ապրում։

«Վերջին օրերին լարվածությունը, իհարկե, մենք էլ ենք զգում, ոչ թե վերջին օրերին, այլ առաջին օրերից սկսած, որովհետև մենք էլ ենք թիկունք, մենք էլ ենք սահմանամերձ: Ժողովուրդը զբաղված է իր առօրյայով, այստեղ բերքի սեզոն է՝ չրագործությունը: Սահմանամերձ Նռանաձորը նռան բերքի իրացման աշխատանքներով է զբաղված, Մեղրին և Արգարակը՝ արքայանարնջի չրագործությամբ», – ասաց Ծատրյանը:

Երեկ Պաշտպանության նախարարությունը հայտնեց, որ Ադրբեջանական կողմը թիրախավորել է Հայաստանի հարավային սահմանը։ Այդուհանդերձ այս շրջանի բնակիչները պայթյունների ձայներ չեն լսել:

«Մեղրի համայնքի վարչական տարածքում ձայները չեն լսվել և որևէ խուճապային տրամադրություն էլ չկա այստեղ», – նշեց համայնքապետարանի ներկայացուցիչը:

Ագարակ քաղաքում պղնձամոլիպդենային կոմբինատն աշխատում է, անփոփոխ ծանրաբեռնվածությամբ գործում է նաև հայ-իրանական սահմանի մաքսակետը։ Բնակիչները վստահեցնում են՝ խուճապ չկա: Այդուհանդերձ շարժն այս շրջանում այդքան էլ ակտիվ չէ, բազմաթիվ տղամարդիկ այժմ առաջնագծում են:

«Ազատությունը» այսօր եղել ենք նաև Գորիսում, Կապանում, այդ քաղաքներում նույնպես իրավիճակը հանգիստ էր։

LEAVE A REPLY

Please enter your comment!
Please enter your name here