Ժընեւի  Հանդիպումը Աւարտեցաւ Խաղաղ Բնակչութեան  Եւ Ոչ Ռազմական  Դիրքեր Չհարուածելու Համաձայնութեամբ – Պատերազմը Կը Շարունակուի

0
66

Երէկ  ուշ  գիշեր,  Ժընեւի մէջ  աւարտեցաւ Հայաստանի  արտաքին գործոց  նախարար Զօհրապ Մնացականեանի եւ   Ազրպէյճանի անոր  պաշտօնակիցին՝ Ճէյհուն Պայրամովի միջեւ հանդիպումը:

Եօթ  ժամ երկարող  բանակցութիւններու  աւարտին՝ խաղաղ բնակչութեան  եւ ոչ ռազմական դիրքեր   չհարուածելու   համաձայնութիւն մը գոյացաւ:  Զինադադարի համաձայնութիւն չգոյացաւ:

Հանդիպումէն   ետք,  ԵԱՀԿ-ի Մինսկի   համանախագահները  ( Իկոր Փոփով՝ Ռուսիա, Սթեֆան  Վիսքոնթի՝ Ֆրանսա  եւ Էնտրու Շոֆեր՝  Մ. Նահանգներ)   հրապարակեցին      հաղորդագրութիւն մը:

Համանախագահները  անգամ մը եւս  զինադադար հաստատելու  կոչ  ուղղեցին կողմերուն:

Միացեալ Նահանգներու   նախագահի ազգային անվտանգութեան  հարցերու  խորհրդական  Ռոպերթ Օպրայըն, Լոս Անճելըսի մէջ  հայ  համայնքի  ներկայացուցիչներուն հետ  ունեցած  հանդիպումին ընթացքին առաջարկեց   սքանտինաւեան  երկիրներէն  խաղաղապահներ  տեղակայել Արցախի եւ Ազրպէյճանի սահմանագիծերուն  երկարութեան վրայ:  Օպրայըն դիտել  տուաւ, որ  ԵԱՀԿ Մինսկի համանախագահ երկիրները, ինչպէս  նաեւ   հակամարտութեան կից  դրացի պետութիւնները մաս  չեն կրնար կազմել խաղաղապահ  ուժերուն:

Օպրայըն   մաղթեց, որ  հակամարտութեան կողմերը  ընդունին սքանտինաւեան երկիրներէն խաաղապահներ  տեղակայելու առաջարկը:

Միւս կողմէ, ՄԱԿ-ի մէջ Ռուսիոյ ներկայացուցիչ  Վասիլի Նեպենզիա յայտնեց, թէ  Անվտանգութեան խորհուրդը հաւանաբար անգամ մը եւս քննարկէ  Լեռնային Ղարաբաղի հարցը:  Դեսպանին կարծիքով, քննարկումը  տեղի կրնայ ունենալ.«Երբ  չբարելաւուի իրավիճակը»:

Նշենք, թէ  Անվտանգութեան խորհուրդը  29 սեպտեմբերին դռնփակ նիստ մը  գումարած էր   Լեռնային  Ղարաբաղի շուրջ, Հայաստանի եւ Ազրպէյճանի  ներկայացուցիչներուն բացակայութեան:

 

LEAVE A REPLY

Please enter your comment!
Please enter your name here