Սէյիտ Նասրալլա. « Պիտի Մասնակցինք Կառավարութեան Կազմութեան Եւ Կարելի Եղածին Չափ Պիտի Դիւրացնենք Այդ Աշխատանքը»

0
92

Հըզպալլայի ընդհանուր քարտուղար սէյիտ Հասան Նասրալլա խստիւ դատապարտեց Նիս քաղաքի ոճիրը եւ ֆրանսական իշխանութիւններուն յայտնեց, որ կարելի չէ կրօնը պատասխանատու նկատել:

Սէյիտ Նասրալլա ընդգծեց, որ Արեւմուտքը նախ եւ առաջ իր պատասխանատուութիւնը պէտք է փնտռէ` հաւատադրժողական խմբաւորումները ստեղծելուն մէջ:

Անդրադառնալով կառավարութեան կազմութեան, սէյիտ Նասրալլա մաղթեց, որ նշանակուած վարչապետը` գործակցութեամբ հանրապետութեան նախագահին, կարենայ կազմել նոր կառավարութիւնը:

«Երկրին կացութիւնը կարելի չէ բարելաւել առանց օրինական բարեկարգումներու, ինչպէս նաեւ կարելի չէ ընթացիկ հարցերու կառավարութեան ներկայութեան շարունակել աշխատանքը: Կառավարութեան կազմութեան հոլովոյթին իմաստով պիտի գործակցինք եւ կարելի եղածին չափ պիտի դիւրացնենք այդ աշխատանքը», ըսաւ ան:

Սէյիտ Նասրալլա աւելցուց, որ տեղեկատուական մարզին հայթայթած լուրերը անճիշդ են, յատկապէս անոնք, որոնք կը վերաբերին կառավարութեան կազմութեան վերաբերեալ Հըզպալլայի մօտեցումին:

«Մենք դրական տրամադրուած ենք եւ այդպէս ալ պիտի մնանք, որովհետեւ ասիկա իսկական կարիք է: Պէտք է մէկդի դնել բոլոր հարցերն ու տարակարծութիւնները, որպէսզի կարելի ըլլայ փոխըմբռնում, գործակցութիւն եւ իրարու հանդէպ բաց քաղաքականութիւն որդեգրել` կառավարութիւնը կազմելու նպատակով», եզրափակեց սէյիտ Նասրալլա:

LEAVE A REPLY

Please enter your comment!
Please enter your name here