Լիբանանի Մէջ «Քորոնա» Ժահրով Վարակուածներուն Թիւը Բարձրացաւ 82.617-ի. 24 Ժամուան Ընթացքին Արձանագրուած Են 1389 Պարագաներ

0
59
Lebanese Health Minister Hamad Hassan speaks during an interview with the Associated Press, in Beirut, Lebanon, Monday, July 20, 2020. Hassan said that the financially troubled Mediterranean country which has so far managed to contain the coronavirus is sliding toward a critical stage, with a new surge of infections after lockdown restrictions were lifted and the airport reopened. (AP Photo/Hussein Malla)

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը բարձրացաւ 82.617-ի` վերջին 24 ժամուան ընթացքին արձանագրելով 1389 նոր վարակուածներ:

Ներքին գործոց եւ քաղաքապետութիւններու հարցերու նախարարի պաշտօնակատար Մոհամետ Ֆահմի յայտնեց, որ երկրին տնտեսական վատ կացութիւնը, ինչպէս նաեւ քաղաքացիներուն «գիտակցութեան» մակարդակը պատճառ դարձան, որ երկիրը այս վիճակին հասնի:

Ֆահմի հաստատեց, որ ինք համաձայն է Լիբանանի ամբողջական փակումին` պայմանով որ բացառութիւններ չըլլան: Ան ընդգծեց, որ իր եւ առողջապահութեան նախարարին միջեւ հարցեր չկան:

Միւս կողմէ, ներքին գործոց նախարարութիւնը հրապարակեց նոր որոշում մը, որուն համաձայն` 115 գիւղաքաղաքներ փակ պիտի մնան, իսկ այսօրուընէ սկսեալ ամբողջ Լիբանանի տարածքին կրակմարի դրութիւն պիտի հաստատուի` երեկոյեան ժամը 9:00-էն մինչեւ առաւօտեան ժամը 5:00:

Նախարարութեան որոշումին համաձայն, նշեալ 115 շրջաններու ճաշարանները, գիշերային զբօսավայրերը, գարեջրատուներն ու փապերը պիտի մնան փակ, իսկ խրախճանքները, հարսանիքներն ու յուղարկաւորութիւններու առիթներով հաւաքոյթները արգիլուած են:

Միւս կողմէ, այն շրջանները, որոնք բաց են, ճաշարանները պիտի գործեն իրենց կարողութեան 50 առ հարիւրին համաձայն:

Փակ շրջաններուն աղօթավայրերը իրենց կարգին փակ պիտի մնան, իսկ կրօնական բոլոր տօներն ու առիթները պիտի ջնջուին:

Նախարարութեան որոշումին համաձայն, 115 գիւղաքաղաքները կը գտնուին հետեւեալ գաւառներուն մէջ. Աքքար, Ալէյ, Պաապտա, Պաալպեք, Պաթրուն, Պընթ Ժիպէյլ, Շուֆ, Մեթն, Հասպայա, Հերմել, Ժեզզին, Ժիպէյլ, Քեսրուան, Քուրա, Մերժահիուն, Մընիէ-Տըննիէ, Նապաթիէ, Ռաշայա, Սայտա, Սուր, Զահլէ, Զղարթա եւ Արեւմտեան Պեքաա:

Կրթութեան եւ բարձրագոյն ուսման նախարարի պաշտօնակատար Թարեք Մաժզուպ հրապարակեց հաղորդագրութիւն մը, որ կը նշէ, թէ ներքին գործոց նախարարութեան կողմէ փակ յայտարարուած բոլոր շրջաններուն մէջ դպրոցները եւս կը մնան փակ:

Մաժզուպի հաղորդագրութեան համաձայն, այլ շրջաններ, որոնք բաց են, դպրոցները բնականոն կերպով կը գործեն, սակայն դպրոցը փակելու առումով գոյութիւն ունեցող որեւէ պատճառի պարագային, պէտք է կապուիլ կրթութեան նախարարութեան հետ եւ համապատասխան որոշումներ տալ:

Միւս կողմէ, առողջապահութեան նախարարի պաշտօնակատար Համատ Հասան երէկ այցելեց Տէյր Ահմարի բուժարանին մէջ «Քորոնա» ժահրով վարակուածներու յատուկ կեդրոնը, ուր շեշտեց, որ Լիբանան կը գտնուի վտանգաւոր անկիւնադարձի մը վրայ` աւելցնելով, որ «Քորոնա»-ի համաճարակին առումով կը գտնուինք աղէտալի կացութեան մէջ:

Հասան ընդգծեց, որ պէտք է բոլորը պատասխանատուութեամբ վարուին եւ իմանան, որ Լիբանան վտանգի ենթակայ է, եւ այս իմաստով կառավարութիւնը պէտք է յանդուգն որոշումներ տայ:

Ան նշեց, որ ինք այս իմաստով խորհրդակցած է հրաժարած վարչապետ Հասսան Տիապի հետ եւ անոր յայտնած ամբողջ երկրին մակարդակով որոշում մը տալու կարեւորութիւնը` աւելցնելով, որ երկրին մէջ կան «Քորոնա» ժահրի վարակակիրներ, որոնք հիւանդանոցներու վերակենդանացման բաժանմունքներուն մէջ տեղ չեն գտներ:

Հասան նշեց, որ ամիս մը առաջ յանձնարարած են ամբողջ երկիրը երկու շաբթուան համար փակել, սակայն ի յայտ եկած է, որ պետութիւնը եւ կառավարութիւնը անկարող են նման որոշում գործադրել, յատկապէս` Պէյրութի նաւահանգիստին պայթումէն եւ անոր ձգած աղէտալի հետեւանքներէն ետք:

Ան նշեց, որ առողջապահութեան նախարարութեան գիտական յանձնախումբը այսօր առաւօտեան, իսկ «Քորոնա»-ի համաճարակին դէմ պայքարի ազգային խորհուրդը այսօր կէսօրին պիտի գումարեն նիստեր, որոնց լոյսին տակ յանձնարարականներ պիտի ներկայացնեն առ որ անկ է, որպէսզի կառավարութիւնը կարենայ համապատասխան որոշումներ տալ:

Հասան նկատել տուաւ, որ Լիբանանի մէջ կացութիւնը մտահոգիչ է, եւ նոր վարակակիրներուն թիւը կրնայ օրական 10 հազար պարագայի հասնիլ` աւելցնելով, որ Լիբանանի մէջ արձանագրուած 2000 վարակակիրներու պարագային, այս թիւը պէտք է 5-ով բազմապատկել, այսինքն` օրական դրութեամբ 10.000 պարագայի մասին է խօսքը:

Ան ընդգծեց, որ երկրին մասնակի փակումը ոչ մէկ արդիւնքի յանգեցուց` աւելցնելով, որ եթէ քաղաքայինները յանձնառու մնային, կարելի կ՛ըլլար աւելի լաւ իրավիճակի մէջ ըլլալ այսօր:

Լիբանանի բժիշկներու սենտիքայի նախագահ Շարաֆ Ապու Շարաֆ կոչ ուղղեց քաղաքացիներուն կարելի եղածին չափ խստացնելու «Քորոնա»-ի համաճարակին դէմ որդեգրուած նախազգուշութիւնները, որպէսզի կարելի ըլլայ այս վտանգաւոր փուլը նուազագոյն վնասներով աւարտել:

Ապու Շարաֆ կոչ ուղղեց քթակապը անպայման օգտագործելու` յորդորելով նաեւ բոլորը պահպանելու ընկերային հեռաւորութեան սկզբունքը:

Առողջապահութեան հարցերու խորհրդարանական մնայուն յանձնախումբի նախագահ, երեսփոխան Ասեմ Արաժի յայտնեց, որ Լիբանան կ՛ենթարկուի «Քորոնա» համաճարակի երկրորդ ալիքին` աւելցնելով, որ ամէն ջանք ի գործ կը դնեն «Քորոնա» ժահրով վարակուած քաղաքայիններուն հիւանդանոցներուն մէջ տեղ ապահովելու, եթէ կարիք զգացուի:

Արաժի շեշտեց, որ կարգ մը պարագաներ իրենց բնակարաններուն մէջ մահացած են` հիւանդանոցներուն մէջ տեղ չըլլալու պատճառով` աւելցնելով, որ Լիբանանի մէջ Իտալիոյ իրավիճակը կը տիրէ, եւ քաղաքացիները պէտք է յաւելեալ պատասխանատուութեամբ վարուին ու նախազգուշութիւնները բծախնդրօրէն գործադրեն:

Արաժի ընդգծեց, որ երկրին կացութիւնը բաւական մտահոգիչ է` «Քորոնա»-ի համաճարակը հակակշռելու առումով:

LEAVE A REPLY

Please enter your comment!
Please enter your name here