Ապպաս Իպրահիմ. «Ուժի Եւ Ճնշումի Բանեցումը Շրջանին Մէջ Միայն Յաւելեալ Ցնցումներ Կրնայ Յառաջացնել»

0
52

Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմ երէկ հարցազրոյցի մը ընթացքին անդրադարձաւ 14 հոկտեմբերին Միացեալ Նահանգներ իր կատարած պաշտօնական այցելութեան` նկատել տալով, որ այդ այցելութիւնը յաջող այցելութիւն մը եղած է բոլոր չափանիշներով:

Ան նշեց, որ իր հանդիպումները իրենց ձեւին եւ բովանդակութեան մէջ եղած են յաջող եւ կարեւոր` աւելցնելով, որ անոնք արժանացած են տեղեկատուութեան մարզին ուշադրութեան:

Իպրահիմ յայտնեց, որ ամերիկեան «Ճէյմս Ֆոլի» հաստատութեան կողմէ իրեն «Մարդասիրական պարգեւ» յանձնելու իրականութիւնը նաեւ կարեւոր կը նկատուի, որովհետեւ անիկա առաջին անգամ ըլլալով է, որ կը յանձնուի ոչ ամերիկացիի մը:

Ապպաս Իպրահիմ յայտնեց, որ Միացեալ Նահանգներու մէջ ամերիկացի պաշտօնատարներուն հետ իր ունեցած քննարկումները եղած են յստակ, անկեղծ ու թափանցիկ: «Իւրաքանչիւր հանդիպումի ընթացքին կը զգայի, թէ Լիբանանն ու անոր շահերը առաջնահերթութիւն են ամերիկացի անձնաւորութիւններուն համար: Կարեւոր է նաեւ ըսել, որ մեր հանդիպումներուն ընթացքին հետաքրքրութիւն կար նաեւ մեր մտածումներուն, տեսակէտներուն եւ Լիբանանի ու շրջանի հարցերուն արժեւորումին նկատմամբ: Լուսարձակի տակ առնուեցաւ նաեւ այն իրականութիւնը, որ քաղաքական կացութիւնը իր ուղղակի ազդեցութիւնը կ՛ունենայ ապահովական իրավիճակին վրայ, ինչպէս նաեւ կարեւորութեամբ շեշտուեցաւ, որ երկխօսութիւնը Լիբանանի ու շրջանի հարցերու լուծման միակ միջոցն է, որովհետեւ ուժի եւ ճնշումի բանեցումը շրջանին մէջ միայն յաւելեալ ցնցումներ կրնայ յառաջացնել», յայտնեց ան:

Ապպաս Իպրահիմ դիտել տուաւ, որ ինք իր հանդիպումներուն ընթացքին շօշափած է այն տրամադրութիւնը, որ բոլոր անոնց, որոնց հանդիպած է, նախանձախնդիր են Լիբանանի ապահովական կայունութեան պահպանումին:

«Նկատի ունենալով Լիբանանի ապահովական կայունութեան նկատմամբ իրենց յանձնառութիւնը` Միացեալ Նահանգներ իրենց պատրաստակամութիւնը կը յայտնեն շարունակելու լիբանանեան զինեալ ուժերուն իրենց տրամադրած զինուորական օժանդակութիւնները», ըսաւ ան` աւելցնելով, որ Ուաշինկթըն կը յարգէ երկրին ապահովութիւնը պահպանելու նպատակով լիբանանեան ապահովութեան ուժերուն ջանքերը:

Անդրադառնալով Սուրիոյ` Իպրահիմ նշեց, որ Սուրիա շրջանին կարեւոր մէկ մասն է, եւ Սուրիոյ պատահարներէն Լիբանանը լրջօրէն կ՛ազդուի:

Սուրիական-լիբանանեան յարաբերութիւններուն մասին հարցումի մը պատասխանելով` Իպրահիմ յայտնեց, որ անիկա երկու երկիրներուն կը վերաբերի, եւ կարելի չէ լիբանանցի պատասխանատուի մը նման հարց տալ: «Բայց եւ այնպէս գաղտնիք մը բացայայտած չենք ըլլար, երբ ըսենք, թէ իբրեւ ապահովական պաշտօնական կառոյց Սուրիոյ մէջ ապրող ամերիկացի քաղաքացիներու օգտակար դարձած ենք` ընդառաջելով ամերիկեան խնդրանքի, եւ դիւրացուցած ենք այդ քաղաքացիներուն ապահով տունդարձը», շեշտեց ան:

Ապպաս Իպրահիմ նկատել տուաւ, որ ամերիկեան «Ճէյմս Ֆոլի» հաստատութեան կողմէ իր ստացած «Մարդասիրական պարգեւ»-ը Լիբանանին մեծարանք է, Լիբանան` մարդուն, Լիբանան` երկխօսութեան եւ այն Լիբանանին, ուր հասակ նետած ենք, հիմնուելով այդ արժէքներուն եւ սկզբունքներուն վրայ:

Նշենք, որ Իպրահիմ երէկ հանդիպումներ ունեցաւ Լիբանանի մէջ Ֆրանսայի դեսպան Ան Կրիոյի եւ Լիբանանի մէջ ՄԱԿ-ի ընդհանուր քարտուղարի անձնական ներկայացուցիչ Իան Քիւպիչի հետ:

LEAVE A REPLY

Please enter your comment!
Please enter your name here