«Կեդրոնական Դրամատան Իրաւական Հաշուեքննութեան Յանձնառու Կը Մնանք Եւ Զայն Անհրաժեշտ Կը Նկատենք Բարեկարգումներ Կատարելու Ճամբուն Վրայ» Ընդգծեց Նախագահ Աուն

0
49

Հանրապետութեան նախագահ զօր. Միշել Աուն երէկ նախագահական պալատին մէջ ընդունեց իրաւական հաշուեքննութեան «Ալվարեզ էնտ Մարսըլ» միջազգային ընկերութեան տնօրէն Տենիըլ Ճէյմսը` ներկայութեամբ ելեւմուտքի նախարարի պաշտօնակատար Ղազի Ուազնիի եւ Կեդրոնական դրամատան կառավարիչ Ռիատ Սալամէի:

Հանդիպումին ընթացքին քննարկուեցան Կեդրոնական դրամատան հաշիւները իրաւական հաշուեքննութեան ենթարկելու վերաբերող հարցեր:

Նախագահ Աուն ընդգծեց Լիբանանի կողմէ Կեդրոնական դրամատան հաշիւներուն շուրջ իրաւական հաշուեքննութիւն կատարելու որոշումին յանձնառու մնալու կարեւորութիւնը` հաստատելով, որ անիկա անհրաժեշտ է Լիբանանի ելեւմտական եւ տնտեսական կացութեան լուծումներ գտնելու համար:

Հանդիպումէն ետք Ուազնի նշեց, որ որոշուած է իրաւական հաշուեքննութեան համար Կեդրոնական դրամատան կողմէ փաստաթուղթերուն ներկայացման ժամկէտը երեք ամիսով յետաձգել:

Ան նշեց, որ Կեդրոնական դրամատան պարագային կան դրամատնային համակարգին գաղտնապահութեան օրէնքներ, որոնցմէ անշեղ պէտք է մնալ, բայց եւ այնպէս համաձայնութիւն գոյացած է դիւրացնել ընթացքը` իրաւական հաշուեքննութիւն կատարելու նպատակով:

Ուազնի նշեց, որ իրաւական հաշուեքննութիւնը բարեկարգչական քայլ մըն է, «իսկ նախագահ Աուն ընդգծած է այդ քայլին յանձնառու մնալու կարեւորութիւնը», աւելցուց ան:

LEAVE A REPLY

Please enter your comment!
Please enter your name here