Լիբանանի Մէջ «Քորոնա» Ժահրով Վարակուածներուն Թիւը Հասաւ 91.328-ի. 24 Ժամուան Ընթացքին Արձանագրուած Են 2142 Պարագաներ

0
65
Հասան. «Երկիրը Ընդհանուր Փակումի Ենթարկելու
Որոշումը Յանդուգն Է Եւ Կարիքը Ունի Բոլորին
Համախոհութեան Ու Լուրջ Վերաբերումին»

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 91.328-ի` վերջին 24 ժամուան ընթացքին արձանագրելով 2142 նոր վարակուածներ:

Հանրապետութեան նախագահ զօր. Միշել Աուն երէկ ընդունեց առողջապահութեան նախարարի պաշտօնակատար Համատ Հասանը, որուն հետ քննարկեց «Քորոնա»-ի համաճարակին վերաբերող մանրամասնութիւններ, ինչպէս նաեւ լիբանանեան ընկերութեան դէմ այդ համաճարակին սպառնացող վտանգներն ու անոր տարածումը զսպելու ձեւերը:

Հանդիպումէն ետք Հասան յայտնեց, որ նախագահ Աունին ներկայացուցած է լիբանանեան հիւանդանոցներուն մէջ տիրող իրավիճակը, ինչպէս նաեւ նախարարութեան որդեգրած կեդրոնացեալ եւ ապակեդրոնացեալ ծրագիրները` զարգացնելու համար առողջապահութեան մարզը եւ բարձրացնելու անոր պատրաստ ըլլալու դրութիւնը:

Հասան նկատել տուաւ, որ Կեդրոնական դրամատան պատասխանատուներուն հետ կը քննարկեն անձնական հիւանդանոցներուն դրամատնային հաշիւներուն յաւելեալ ճկունութիւն ընծայելու կարելիութիւնները, որպէսզի անոնք կարենան բարելաւել իրենք զիրենք եւ պատրաստուիլ աւելի մեծ թիւով «Քորոնա» ժահրի վարակակիրներ ընդունելու:

Հասան նշեց, որ երկիրը ընդհանուր փակումի ենթարկելու որոշումը յանդուգն է եւ կարիքը ունի բոլորին համախոհութեան, ինչպէս նաեւ բոլորին լուրջ վերաբերումին:

Ան նկատել տուաւ, որ յառաջիկայ փուլին ընթացքին պէտք է ապահովական կառոյցներուն եւ համապատասխան նախարարութիւններուն հետ ճիշդ գնահատական տալ կացութեան, որպէսզի կարելի ըլլայ համաճարակին մասին ճիշդ ճիշդ որոշումներ որդեգրել:

Միւս կողմէ, Բժիշկներու սենտիքայի նախագահ Շարաֆ Ապու Շարաֆ կոչ ուղղեց երկու շաբաթով երկիրը լրիւ փակելու, ինչպէս նաեւ հիւանդանոցները կահաւորելու եւ սարքաւորելու, որպէսզի անոնք կազմ ու պատրաստ ըլլան «Քորոնա» ժահրով վարակուած քաղաքացիներուն բժշկական հոգատարութիւն ցուցաբերելու:

LEAVE A REPLY

Please enter your comment!
Please enter your name here