Պասիլի Դէմ Ամերիկեան Պատժամիջոցներ Կը Հաստատուին

0
47

Միացեալ Նահանգներու ելեւմուտքի նախարարութիւնը երէկ պատժամիջոցներ հաստատեց Ազգային ազատ հոսանք կուսակցութեան ղեկավար, երեսփոխան Ժըպրան Պասիլի դէմ:

Ելեւմուտքի նախարար Սթիվըն Մունիչըն նշեց, որ Պասիլ ամբաստանուած է լիբանանեան վարչակարգին մէջ կազմակերպուած փտածութիւն գործադրելու եւ անոր իբրեւ հետեւանք կառավարութեան հիմերը քայքայելու յանցանքով:

Միացեալ Նահանգներու արտաքին գործոց նախարար Մայք Փոմփէօ յայտնեց, որ Պասիլ իր գործունէութեամբ փտածութիւն տարածած է եւ օժանդակած, որ լիբանանեան վարչակարգին մէջ բոյն դրած փտածութիւնը զարգանայ:

Ան նշեց, որ պատժամիջոցի ենթարկուած ոեւէ անձնաւորութիւն չի կրնար Միացեալ Նահանգներ մուտք գործել` աւելցնելով, որ լիբանանցի ղեկավարները պէտք է անսան իրենց ժողովուրդի պահանջներուն, բարեկարգումներ գործադրեն, ինչպէս նաեւ վերջ տան փտածութեան:

Ամերիկացի բարձրաստիճան այլ պաշտօնատար մը հաստատեց, որ Պասիլի կողմէ Հըզպալլայի հանդէպ ցուցաբերուած մնայուն զօրակցութիւնն է, որ Ուաշինկթընը մղած է Պասիլի դէմ պատժամիջոցներ որդեգրելու:

Լիբանանի մէջ ամերիկեան դեսպանատունը հրապարակեց հաղորդագրութիւն մը, որ կը նշէ, թէ պատժամիջոցները անձամբ Պասիլի դէմ հաստատուած են եւ ոչ թէ Ազգային ազատ հոսանք կուսակցութեան:

Միացեալ Նահանգներու արտաքին գործոց նախարարի Մերձաւոր Արեւելքի հարցերով օգնական Տէյվիտ Շենքըր հարցազրոյցի մը մէջ յայտնեց, որ Պասիլի դէմ հաստատուած պատժամիջոցը ուղղակիօրէն թիրախ կը դարձնէ Պասիլի նիւթական աղբիւրները, այլ խօսքով` դրամատնային հաշիւները:

Շենքըր նկատել տուաւ, որ պատժամիջոցին հիմնական պատճառը Պասիլի եւ Հըզպալլայի գործընկերութիւնն է, որ օժանդակած է փտածութեան տարածումին:

Ան մաղթեց, որ Պասիլ եւ լիբանանցի քաղաքական այլ անձնաւորութիւններ կեդրոնանան Լիբանանի մէջ բարեկարգումներ իրագործելու ջանքերուն վրայ:

Իր դէմ հաստատուած ամերիկեան պատժամիջոցներուն իբրեւ պատասխան Պասիլ կատարեց հետեւեալ գրառումը. «Ո՛չ պատժամիջոցները զիս վախցուցին, ո՛չ ալ խոստումները` շլացուցին: Ոչ մէկ լիբանանցիի դէմ կը տրամադրուիմ եւ կը մերժեմ ինքզինքս փրկել` Լիբանանը սպառելու փոխարէն: Անիրաւութեան ընտելացայ, իսկ պատմութենէն սորվեցայ, որ Արեւելքի մէջ ապրելու համար պէտք է օրական դրութեամբ կրենք մեր խաչը, որպէսզի գոյատեւենք»:

Միւս կողմէ, Հըզպալլա երէկ երեկոյեան հրապարակեց հաղորդագրութիւն մը, որ կը նշէ, թէ Պասիլի դէմ հաստատուած ամերիկեան պատժամիջոցները դատապարտելի են, ինչպէս նաեւ Լիբանանի ներքին հարցերուն միջամտութիւն:

Հըզպալլա զօրակցութիւն յայտնեց Ազգային ազատ հոսանք կուսակցութեան եւ անոր ղեկավարին` շեշտելով անհիմն այս որոշումներուն եւ մերժելի զրպարտութիւններուն դէմ պայքարելու իր պատրաստակամութիւնը:

LEAVE A REPLY

Please enter your comment!
Please enter your name here