Արեւմուտքը Կը Փորձէ Հայերը Համոզել, Որ Արցախի Մէջ Խաղաղութիւնը Պարտութիւն Է, Իսկ Ատրպէյճանցիներուն, Որ Քրեմլինը Գողցած Է Իրենց Յաղթանակը. Նարիշքին

0
52

ՄՈՍԿՈՒԱ, «ՌԻԱ Նովոսթի».- Արեւմուտքը կը սադրէ հայ եւ ատրպէյճանցի ազգայնականներուն՝ խափանելու համար Արցախի մէջ զինադադարի մասին համաձայնութիւնը, յայտարարեց Ռուսիոյ արտաքին հետախուզութեան ծառայութեան ղեկավար Սերկէյ Նարիշքին:

«Արեւմտեան կարգ մը երկիրներ իրենց հասանելի ուղիներով հայ եւ ատրպէյճանցի ազգայնականները կը դրդեն վարկաբեկել եւ խախտել զինադադարի մասին համաձայնութիւնները։ Անոնք կը փորձեն համոզել հայերը, որ Լեռնային Ղարաբաղի մէջ խաղաղութիւնը պարտութիւն է Երեւանի համար, յառաջ կը բերուի պատերազմի յաղթական աւարտի անհրաժեշտութեան գաղափարը: Ատրպէյճանցիներուն կ՛ըսեն ընդհակառակը, որ Քրեմլինը գողցած է իրենց յաղթանակը, երբ ատրպէյճանական բանակը մէկ քայլ հեռաւորութեան վրայ էր Ստեփանակերտի գրաւումէն», յայտարարեց Նարիշքին՝ աւելցնելով. «Նման գործողութիւններ անգամ մը եւս վկայութիւն են այն բանին, որ Միացեալ Նահանգները եւ անոնց եւրոպացի ընկերները, ինչպէս միշտ, կը լուծեն իրենց հարցերը հասարակ մարդոց, այս անգամ՝ հայերու եւ ատրպէյճանցիներու շահերուն հաշուոյն»:

Միւս կողմէ, Ռուսիոյ արտաքին գործոց փոխնախարար Անտրէյ Ռուտենքօ յայտնեց, թէ յոյս ունի, որ Հայաստանի մէջ տեղի ունեցող բողոքի ցոյցերը Արցախի տագնապի գօտիին մէջ իրավիճակը չեն ապակայունացներ եւ չեն սպառնար եռակողմ յայտարարութեան բոլոր կէտերու իրականացման:

LEAVE A REPLY

Please enter your comment!
Please enter your name here