Նիկոլ Փաշինեանի Հրաժարականի Պահանջով Բողոքի Ցոյցեր Երեւանի Մէջ

0
59

ԵՐԵՒԱՆ.- 19 Նոյեմբերին, Երեւանի մէջ տեղի ունեցան վարչապետ Նիկոլ Փաշինեանի հրաժարականի պահանջով բողոքի ցոյցեր, որոնց ընթացքին քաղաքի զանազան հատուածներու մէջ մարդիկ փողոցներ փակեցին:

ՀՅԴ Երիտասարդական Միութեան խումբ մը երիտասարդներ փակեցին դէպի Հանրապետութեան հրապարակ տանող Ամիրեան-Մաշտոց խաչմերուկը, ուր պատ կազմած ցուցարարներուն վրայ քշեց ինքնաշարժ մը՝ ճեղքելով ցուցարարներուն կազմած պատը, եւ գետին փռելով ցոյցին մասնակցող երիտասարդ աղջիկ մը: Քանի մը վայրկեան ետք ան ոտքի կանգնեցաւ եւ շարունակեց ցոյցը։ «Յանուն հայրենիքի եմ ցոյց անում, յանուն իմ Արցախի եմ անում: Ես արցախցի եմ, ես իմ տունն եմ ուզում Արցախում, քանի մեքենայ ուզում է` ինձ տակը գցի, ես իմ տունը դաւաճան Նիկոլից ուզում եմ», յայտնեց ան: Ոստիկանութիւնը գտաւ 27ամեայ վարորդը, որ տարուեցաւ Կեդրոնական բաժին, իսկ ինքնաշարժը գրաւուեցաւ:

Նիկոլ Փաշինեանի հրաժարականի պահանջով խումբ մը քաղաքացիներ փակեցին նաեւ Մեասնիկեան պողոտան։ Անոնք իրենց դժգոհութիւնը եւ ցասումը արտայայտեցին Հայաստանի, Ռուսիոյ եւ Ատրպէյճանի կնքած` Արցախի մէջ պատերազմը աւարտելու եւ Արցախի անձնատուութեան համաձայնութեան նկատմամբ: Որոշ ժամանակ ետք, ցուցարարները բացին փողոցը եւ ցոյցը շարունակեցին մայթերուն վրայ։ Ոստիկաններ վեց քաղաքացիներ բերման ենթարկեցին եւ ցրուեցին խաղաղ ցոյցը:

LEAVE A REPLY

Please enter your comment!
Please enter your name here