Լիբանանի Մէջ «Քորոնա» Ժահրով Վարակուածներուն Թիւը Հասաւ 111.905-ի. 24 Ժամուան Ընթացքին Արձանագրուած Են 1909 Պարագաներ

0
47

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 111.905-ի` վերջին 24 ժամուան ընթացքին արձանագրելով 1909 նոր վարակուածներ:

Միւս կողմէ, առողջապահութեան նախարար Համատ Հասան երէկ մամլոյ ասուլիսի մը ընթացքին յայտնեց, որ առողջապահութեան նախարարութիւնը պատմական նուաճում իրագործած է հիւանդանոցներուն նիւթական իր պարտաւորութիւնները կատարելով:

Հասան նշեց, որ առողջապահութեան նախարարութեան կողմէ կազմուած է յանձնախումբ մը, որ պիտի հետեւի «Քորոնա» ժահրով վարակուած այն պարագաներուն, որոնք հիւանդանոցային խնամքի կարիքը ունին:

Հասան նկատել տուաւ, որ յանձնախումբը պիտի ստուգէ նաեւ այդ հիւանդներուն տրամադրուած բժշկական ծառայութիւնը` աւելցնելով, որ անցեալ շաբթուան ընթացքին անձնական հիւանդանոցներուն մէջ 80 յաւելեալ անկողիններ տրամադրուեցան` «Քորոնա» ժահրով վարակուածներուն համար:

Ան նկատել տուաւ, որ «Քորոնա» ժահրով վարակուածներուն թիւին նուազեցման ճիգերը տակաւին շօշափելի արդիւնքներ չեն արձանագրած` կոչ ուղղելով քաղաքացիներուն համբերութեամբ զինուելու, որպէսզի կարելի ըլլայ ի վերջոյ այդ արդիւնքներուն յանգիլ:

Իր կարգին, ներքին գործոց եւ քաղաքապետութեանց հարցերու նախարարի պաշտօնակատար Մոհամետ Ֆահմի յայտնեց, որ ներքին ապահովութեան ուժերը երկրի փակման որոշումի գործադրութեան հսկելու իրենց աշխատանքին ընթացքին կեցուցած են ինքնաշարժ մը, որ խախտում կատարած է` ինքնաշարժի զոյգ եւ անզոյգ թիւերուն ճշդուած յատուկ օրերու օրէնքին դէմ:

Ֆահմի նկատել տուաւ, որ ներքին ապահովութեան ուժերը կանգնեցուցած են խախտում կատարող ինքնաշարժը եւ զայն վարողին տեղեկացուցած են այդ խախտումին մասին: Ան ինքզինք արդարացուցած է ըսելով, որ ինք լրագրող է, եւ ի յայտ եկած է, որ ան լրագրողի կեղծ արտօնագիր կրող ոչ լիբանանցի քաղաքացի մըն է եւ կ՛աշխատի շինարարական աշխատանքին մէջ:

Հարցաքննութենէն ետք ներքին ապահովութեան ուժերը ձերբակալեցին տուեալ լրատուամիջոցին սեփականատէրը, որ իրաւաբան մըն է, եւ զայն փոխանցեցին համապատասխան դատական ատեան:

LEAVE A REPLY

Please enter your comment!
Please enter your name here