«Թէ՛ Վարչապետը, Թէ՛ Նախագահը Հաւատարիմ Են Լեռնային Ղարաբաղի Շուրջ Համաձայնութեան Իրագործման» Կ՛ըսէ Լաւրով

0
202

Ռուսիոյ արտաքին գործոց նախարար Սերկէյ Լաւրով շաբաթ օր Երեւան կատարած այցելութեան ծիրին մէջ լրագրողներու հետ հանդիպումի ընթացքին անդրադարձաւ 9 նոյեմբերին Հայաստանի վարչապետ Նիկոլ Փաշինեանի, Ռուսիոյ նախագահ Վլատիմիր Փութինի եւ Ազրպէյճանի նախագահ Իլհամ Ալիեւի ստորագրած եռակողմ յայտարարութեան, որով դադրեցուած են Արցախի մէջ զինուորական գործողութիւնները:

Ան նշեց, որ հանդիպումներուն ընթացքին երկու կողմերը գլխաւորաբար ուշադրութիւն դարձուցած են յայտարարութեան յստակ եւ լիարժէք իրագործման առնչուած խնդիրներուն: «Հայաստանի մէջ բանակցութիւններու ընթացքին բոլոր կողմերը ընդունած են, որ Ղարաբաղի հարցով 9 նոյեմբերի յայտարարութիւնը այլընտրանք չունի. մենք հանդիպած ենք նաեւ Հայաստանի նախագահի հետ, թէ՛ ան, թէ՛ վարչապետը ընդգծած են, որ այս յայտարարութիւնը օգնած է լուծել լրջագոյն խնդիրներ, փրկել կեանքեր: Անոնք ամբողջովին հաւատարիմ են այսուհետեւ այս համաձայնութեան իրագործման», ըսած է Լաւրով:

Լաւրովի համաձայն, տուեալ յայտարարութեան վերատեսութեան վերաբերեալ փորձերը անընդունելի են:

«ՌԻԱ Նովոսթի» կը հաղորդէ, որ ան յոյս յայտնած է, որ ԵՈՒՆԵՍՔՕ-ն մեծ աշխուժութիւն կը ցուցաբերէ Լեռնային Ղարաբաղի մէջ յուշարձաններու պահպանման հարցին մէջ: Աղբիւրը կը մանրամասնէ, որ Լաւրով մէկ օր առաջ զրուցած է ԵՈՒՆԵՍՔՕ-ի ղեկավար Օտրէ Ազուլէի հետ` նշելով. «Պէտք է, որ կազմակերպութիւնը գոյութիւն ունեցող ուխտին համաձայն Լեռնային Ղարաբաղի մէջ եւ ատոր շուրջ մշակութային, քաղաքակրթական եւ կրօնական ժառանգութեան պահպանման հարցին մէջ առաւել նախաձեռնողական կերպով հանդէս գայ իր ծառայութիւններու գործադրման առաջարկներով, ինչ որ կարեւոր ներդրում պիտի ըլլայ այս հնագոյն շրջանին մէջ միջկրօնական, ազգամիջեան հաշտեցման եւ ներդաշնակութեան ապահովման համար»:

«Յոյս ունինք, որ ԵՈՒՆԵՍՔՕ-ն այստեղ առաւել աշխուժ գործունէութիւն պիտի ծաւալէ, քան Սուրիոյ մէջ` նախ եւ առաջ Հալէպի եւ Փալմիրի մէջ` ի պատասխան մշակութային յուշարձաններու պահպանման վերաբերեալ ստացուած մեծաթիւ դիմումներու. պարզ խօսքով` ԵՈՒՆԵՍՔՕ-ի մեր ընկերները իրենք զիրենք այնքան ալ գործօն չեն դրսեւորած», նկատած է նախարարը:

Ռուսիոյ արտաքին գործոց նախարարը Երեւան իր կարճատեւ այցելութենէն ետք մեկնեցաւ Պաքու: ԹԱՍՍ լրատու գործակալութիւնը կը հաղորդէ, որ ան յայտարարած է, թէ յոյս ունի, որ ԵԱՀԿ-ի Մինսքի խմբակի համանախագահները կը միանան Լեռնային Ղարաբաղի մէջ 9 նոյեմբերին ձեռք բերուած եռակողմ համաձայնութիւններուն հիմամբ մարդասիրական առաջադրանքներու լուծման:

«Մենք կը գնահատենք, որ Ազրպէյճանի նախագահ Իլհամ Ալիեւը հետեւողականօրէն կը շեշտէ շրջանին մէջ հաշտեցման  իրագործումը, որուն մէջ մեր խոր համոզմամբ կը կայանայ հետագայ աշխատանքներու ամբողջ իմաստը, եթէ մտածենք բացառապէս միայն մարդոց մասին, եւ ոչ թէ որեւէ այլ շահի», ըսած է Լաւրով Ազրպէյճանի նախագահ Իլհամ Ալիեւի հետ հանդիպումի ընթացքին:

Լաւրով ընդգծած է Լեռնային Ղարաբաղի մէջ մարդասիրական խնդիրներու լուծման գործին մէջ միջազգային կազմակերպութիւնները ներգրաւելու անհրաժեշտութիւնը:

«Մենք մեր խաղաղապահներուն միջոցով ազրպէյճանցի գործընկերներուն հետ, ինչպէս նաեւ հայկական կողմին մասնակցութեամբ, աշխոյժ կերպով կը համաձայնեցնենք մարդասիրական առաջադրանքներու լուծումը` ի շահ վերադարձող բնակչութեան: Ատիկա թէ՛ քաղաքային ենթակառոյցներու վերանորոգման հարցին լուծումն է, թէ՛ փոխադրամիջոցային ու տնտեսական ապաշրջափակման համար անհրաժեշտ բոլոր հաղորդակցութիւններու կազմակերպումը: Եւ անկասկած յոյս ունինք, որ ԵԱՀԿ-ի Մինսքի խմբակի համանախագահները, որոնք Ռուսիոյ հետ երկար տարիներ կը ղեկավարեն քաղաքական հոլովոյթը, կը միանան այդ առաջադրանքներու որոշման` հաշուի առնելով 9 նոյեմբերին ձեռք բերուած համաձայնութիւնները». նշած է Լաւրով:

LEAVE A REPLY

Please enter your comment!
Please enter your name here