Պէյրութի Նաւահանգիստի Պայթումին Գծով Դատական Հարցաքննութեան Կոչեր

0
383
FILE - This combo of file photos taken Aug. 4, 2020, shows Sedra Kinno, top left, and her sister Hoda, top right, being carried by relatives in the aftermath of the massive explosion at the Beirut port on Aug. 4, in Beirut, Lebanon. At bottom left Sedra Kinno, and her sister Hoda, 11, are evacuated by relatives. At bottom right, Hoda is evacuated with other injured people by a Lebanese army vehicle. Sedra, 15, died in the explosion, while Hoda survived with a broken neck and other injuries. (AP Photo/Hassan Ammar)

Դատական հարցաքննութեանց ծիրին մէջ, անցնող 4 օգոստոսին Լիբանանը ցնցած եւ հարիւրաւոր զոհեր ու ծանր կորուստներ պատճառած Պէյրութի նաւահանգիստի ահաւոր պայթումին հետաքննութիւնը ստանձնած դատաւոր Ֆատի Սուուան, երէկ  հարցաքննութեան կոչ ուղղեց երկրի բարձրաստիճան պատասխանատուներու` հրաժարեալ վարչապետ Հասսան Տիապի, աշխատանքի նախկին երկու նախարարներու` Եուսեֆ Ֆինիանոսի եւ Ղազի Զաայթերի եւ ելեւմուտքի նախկին նախարար Ալի Հասան Խալիլի հասցէին` իրենց պաշտօնավարութեան ընթացքին թերացման եւ անփութութեան մեղադրանքներով:

Դատական գերագոյն խորհուրդը հաղորդագրութեամբ մը յայտնեց, որ սահմանադրական օրէնքի տրամադրութեանց հիման վրայ, դատախազ Սուուան յառաջիկայ երկուշաբթի պիտի այցելէ վարչապետարան, ուր պիտի հարցաքննէ հրաժարեալ վարչապետ Հասսան Տիապը: Իսկ մեղադրեալ նախարարները դատարան պիտի ներկայանան հերթաբար` յառաջիկայ երկուշաբթի, երեքշաբթի եւ չորեքշաբթի օրերը:

Պայթումէն հինգ օր ետք դէպքին ծալքերուն շուրջ խոստացուած բացատրութիւնը հինգ ամիս ետք դատական հայցով ներկայացաւ երկրի իշխանութեանց դէմ, փոխադարձ մեղադրանքներով կուտակուած` զգալի աղմուկ բարձրացնելով խնդրոյ առարկայ կողմերուն եւ առհասարակ քաղաքական ընտրանիին մօտ: Իր հաղորդագրութեան մէջ Դատական գերագոյն խորհուրդը հաստատեց, որ նախապէս` 24 նոյեմբեր 2020-ին խորհրդարան յղած է յուշագիր մը` կարգ մը կասկածելի անձնաւորութիւններու անձեռնմխելիութեան վերացման պահանջով, սակայն խորհրդարանի ղեկավարութիւնը մերժած են ընդառաջել` առարկելով, որ Պէյրութի նաւահանգիստի պայթումին գծով մեղադրելի անձնաւորութիւն չկայ խորհրդարանի կազմին մէջ:

Դատաւոր Սուուան նոյն հարցով երեք ժամ տեւողութեամբ հարցաքննած է առնչակից նախկին ապահովական պատասխանատուներէն գնդապետ Թոնի Սալիպան:

Հակազդելով իր հասցէին ուղղուած մեղադրանքին` հրաժարեալ վարչապետ Հասսան Տիապ իր կարգին հաղորդագրութիւն մը հրապարակեց` շեշտելով, որ ինք կապ չունի նշեալ պայթումին հետ, եւ իր «խիղճը հանգիստ է»: Տիապ փոխադարձաբար քննադատեց դատախազ Սուուանը, թէ ան անտեսած է սահմանադրութեան տրամադրութիւնները եւ անձէն անդին վարչապետի՛ն հանգամանքն է, որ թիրախաւորած է: «Ասիկա արտօնելի չէ եւ վերջակէտ», շեշտեց Տիապ: Նոյն ծիրին մէջ, խորհրդարանական «Ազատագրում եւ բարգաւաճում» պլոքի անդամ, ելեւմուտքի նախկին նախարար Ալի Հասան Խալիլ յայտնեց, թէ իրենք միշտ յայտնած են, որ օրէնքի տրամադրութեան տակ են:

Նախկին վարչապետ Նեժիպ Միքաթի քննադատեց դատախազ Սուուանի այս քայլը` նշելով, որ «երկու չափ, երկու կշիռ» քաղաքականութեամբ արդարութիւն չի հաստատուիր: Այլ աղբիւրներ հարցադրումներ կատարեցին, թէ նախագահ Միշել Աուն եւս պաշտօնապէս տեղեակ պահուած էր նաւահանգիստին մէջ վտանգաւոր պայթուցիկ ամոնիոմ նիթրաթի գոյութեան մասին, արդ «ինչո՞ւ ինք ալ հարցաքննութեան չ՛ենթարկուիր»:

«Այս խմորը բաւական ջուր պիտի վերցնէ», կ՛ըսէ առածը, եւ իրապէս` նախընթաց կազմող դատական այս հարցը կրնայ փոխադարձ «ցեխարձակումներու» դուռ բանալ եւ հանրային կարծիքին ուշադրութիւնը վրիպեցնել ոչ նուազ կարեւոր` կառավարութեան կազմութեան հրամայական պահանջէն: Փաստօրէն, դատական նշեալ խորհուրդը կը նշէ, թէ իր հետաքննութեանց ընթացքին կապ պահած է առնչակից տեղական թէ արտաքին պատկան մարմիններուն հետ, յաւելեալ ճշգրիտ տեղեկութիւններու հայցով: Սակայն ֆրանսական կողմը , որ միաժամանակ ի՛ր հետաքննութիւնը կը կատարէ, պատասխանած է, որ դէպքին գծով արբանեակային նկարահանումներու արդիւնքները հազիւ յառաջիկայ փետրուար-մարտ 2021-ին կը հրապարակուին, նմանապէս եւ քննութեանց եզրայանգումները:

Այս գծով քաղաքական մեկնաբան Սալեմ Զահրան զգուշացուց, որ յառաջիկայ փետրուար եւ մարտ ամիսները խիստ զգայուն, վտանգաւոր կը նկատուին Լիբանանի համար: Զահրան դատաւոր Սուուանին թելադրեց կարդալ ֆրանսական հետաքննութեանց տեղեկագիրը: Անոր այս զգուշացումները կը զուգադիպին ապահովական այլ աղբիւրներու զգուշացումներուն, ըստ որոնց, խոր մտավախութիւն կայ` նահատակ Ռաֆիք Հարիրիի սպանութեան պայթումին տարողութիւնը գերազանցելիք ապահովական ցնցումներու գծով:

Լիբանանցիի առօրեայ քաղաքական, առողջապահական, տնտեսական, ապրուստի եւ առհասարակ կենցաղային մտահոգութիւններուն վրայ աւելցաւ «անկոչ հիւր» մը եւս, որ նոյնքան մտահոգիչ մղձաւանջի կրնայ մատնել քաղաքացիին կեանքը:

LEAVE A REPLY

Please enter your comment!
Please enter your name here