Կապանի Եւ 13 Գիւղերու Բարձունքները Պիտի Յանձնուին Ատրպէյճանին

0
564

ԵՐԵՒԱՆ, «Թերթ».- Կապանի համայնքապետ Գէորգ Փարսեան «Հետք»ի հետ ունեցած զրոյցի մը ընթացքին յայտնեց, որ 17 Դեկտեմբերի առաւօտեան պաշտպանութեան նախարարութենէն հրահանգ տրուած է՝ Կապանի ներկայ պաշտպանական դիրքերը Ատրպէյճանին յանձնելու մինչեւ 18 Դեկտեմբեր, յետմիջօրէի ժամը 5. «Ես մտածում էի, որ այս իշխանութիւնները բերելու են հասցնեն այս հանգուցալուծմանը: Այդպիսի մտավախութիւններ ունէի»:

Այսպիսով Ատրպէյճանի վերահսկողութեան տակ պիտի անցնին այն դիրքերը, որոնք կ՛ապահովեն Կապանի եւ յարակից 13 գիւղերու անվտանգութիւնը. ըստ համայնքապետին՝ անոնք են. Դաւիթ Բէկ, Կաղնուտ, Ուժանիս, Եղուարդ, Ագարակ, Դիցմայրի, Սիւնիք, Գեղանուշ, Ճակատէն, Շիկահող, Ներքին Հանդ եւ Ծաւ գիւղերը ու Կապան քաղաքը, որոնք բոլորը կը մտնեն Կապան համայնքին մէջ: Այսպիսով Կապան քաղաքի ոչ-բնակելի հատուածի հեռաւորութիւնը սահմանէն պիտի ըլլայ 100 մեթր, իսկ բնակելի հատուածէն՝ 1 քիլոմեթր:

«Այս բոլոր տարածքները մինչեւ 1929թ. եղել են հայկական տարածքներ: 1929թ. դրանք տրուել են Ադրբեջանին: Այդ տարածքներում ներառուել է 21 գիւղ: Եւ ինչի՞ պիտի սահմանազատումն արուի 1974ի քարտէզով, այլ ոչ թէ, օրինակ, 1929ի», հարց տուաւ համայնքապետը: Ներկայի Գորիս-Կապան-Մեղրի մայրուղիի որոշ հատուածներ կ՛անցնին այնպիսի տարածքներով, որոնք կա՛մ պէտք է անցնին ատրպէյճանական վերահսկողութեան տակ, կա՛մ յայտնուին անմիջական սահմանին վրայ, իսկ Գորիս-Կապան ճամբուն անվտանգութիւնը պիտի ապահովուի ռուս սահմանապահներուն միջոցով:

Մինչ այդ, Սիւնիքի մարզ կատարած աշխատանքային այցելութեան ծիրին մէջ Հայաստանի պաշտպանութեան նախարար Վաղարշակ Յարութիւնեան հանդիպում ունեցաւ մարզի կարգ մը համայնքներու ղեկավարներուն հետ, որոնք իրենց մտահոգութիւնը յայտնեցին մարզի սահմանային ճշգրտումներուն իբրեւ արդիւնք ստեղծուած բարդ իրավիճակին վերաբերեալ: Անոնք դիտել տուին, որ սահմանագիծի փոփոխութիւններով պայմանաւորուած՝ հակառակորդի թիրախ կը դառնան կարգ մը բնակավայրեր, որոնց կարգին՝ Կապանը:

Պաշտպանութեան նախարարը նշեց, որ սահմանը կը ճշդուի երկու կողմերու բարձրաստիճան սպաներու ներկայութեան, եւ որ Հայաստանի տարածքէն որեւէ մեթր պիտի չզիջին: Ընդգծուեցաւ, որ այդ հատուածներուն մէջ հսկողութիւն պիտի կատարեն ռուս սահմանապահները, ինչ որ յաւելեալ երաշխիք է անվտանգային համակարգը ուժեղացնելու համար:

Միւս կողմէ, 17 Դեկտեմբերին այս քայլին դէմ բողոքի ցոյցեր կատարեցին Գորիսի եւ Կապանին բնակիչները, որոնք դիտել տուին, որ տուեալ շրջանները այսպիսով պիտի վերածուին թուրքին անմիջական թիրախի։ «Թող գան էստեղ ապրեն, նոր իմանան: Եթէ Սիւնիքը տուեցին, Երեւանի դուռն էլ են ծեծելու», ըսաւ ցուցարարներէն մէկը։ Անոնք անվտանգ տեղաշարժ պահանջեցին։

«Մենք չենք կարող գիւղի կէսը տալ թշնամուն, ոչ մի բնակիչ չի հեռանալու: Մեր ընկերները, հարազատները զոհուեցին, մենք ողջ մնացինք, ո՞րն է մեր ողջ մնալու իմաստը, այսօր Սիւնիքի ճակատագիրն են որոշում առանց մեզ: Վերջը մնո՞ւմ ենք, թէ չենք մնում: Ասում է` Հայաստանի սահմանը փոփոխութեան չի ենթարկւում, իրա սահմանը ուրիշ ա, մերը ուրիշ, երեւի», յայտնեց այլ բնակիչ մը։

LEAVE A REPLY

Please enter your comment!
Please enter your name here