«Ազրպէյճանի Կազմակերպած Ջարդերը Փանթուրքական Գաղափարախօսութեան Պարունակին Մէջ Ըստ Էութեան 1915-ի Ցեղասպանութեան Շարունակութիւնն Են» Հաստատեց Փրոֆ. Գէորգ Ստեփանեան

0
509

«Ազդակ»-ի առցանց 19-րդ լսարանին զեկուցեց Հայաստանի գիտութիւններու ազգային ակադեմիայի պատմութեան հիմնարկի հայկական գաղութներու եւ սփիւռքի պատմութեան բաժանմունքի վարիչ փրոֆ. Գէորգ Ստեփանեան: Նիւթ` «Ազրպէյճանական նենգափոխումները 1918-ի իրադարձութիւններուն»:

Փրոֆ. Ստեփանեան, Պաքու նահանգի պատմականը հիմնական բաժիններով ներկայացնելէ ետք, հաստատեց Պաքուի հայակերտ քաղաք ըլլալու հանգամանքը: Ապա, ան ներկայացուց մուսաւաթականներու եւ իթթիհատականներու փանթուրքական ծրագիրներուն Պաքուն ներառելը եւ այդ առումով կովկասեան կեդրոն դարձնելու քաղաքականութիւնը: Գէորգ Ստեփանեան խօսեցաւ նաեւ խորհրդային իշխանութիւններուն դէմ փանթուրքական կովկասեան թաթարներու մղած պայքարին եւ այդ բոլորին մէջ Ստեփան Շահումեանին Դաշնակցութեան բերած գործնական աջակցութեան եւ համագործակցութեան մասին:

Փրոֆ. Ստեփանեան այնուհետեւ կովկասեան թաթարներէն Ազրպէյճան արուեստական պետական կազմաւորումի հոլովոյթը ներկայացնելով կեդրոնացաւ ազրպէյճանցիներու կողմէ տարբեր քաղաքներու մէջ իրականացած ցեղային զտումներուն վրայ, որոնք ըստ էութեան 1915-ի ցեղասպանութեան շարունակութիւնն են:

Դասախօսութեան վերջին բաժինով Գէորգ Ստեփանեան Հէյտար Ալիեւով մշակուած պետական մակարդակի պատմակեղծարարութեան ծալքերը մանրամասնօրէն ներկայացուց` խօսելով Պաքուի արտադրանքներուն մասին: Ան եզրափակեց, որ ո՛չ միայն պատմութեան ժխտումի մասին է խօսքը այս պարագային, այլ նաեւ կեղծարարութեամբ նոր պատմութիւն շարադրելու, ուր հայերը ամբաստանուած են իբրեւ ազրպէյճանցիները ցեղասպանութեան ենթարկողներ:

Դասախօսութեան հետեւեցաւ քննարկում արցախեան ազատամարտին վերաբերող ժամանակակից դէպքերու նենգափոխման եւ ազրպէյճանցիները իբրեւ ցեղասպանեալ ժողովուրդ ներկայացնելու ու միջազգային հանրութիւնը ապակողմնորոշելու փորձերուն մասին:

LEAVE A REPLY

Please enter your comment!
Please enter your name here