Երեսփոխան Բագրատունի Պըրրիի Հետ Քննարկեց Լիբանանեան Իրադարձութիւններն Ու Այսօրուան Նիստին Վերաբերող Հարցեր

0
323

ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ այցելեց խորհրդարանի նախագահ Նեպիհ Պըրրիի, որուն հետ քննարկեց լիբանանեան իրադարձութիւնները ինչպէս նաեւ խորհրդարանի այսօրուան լիագումար նիստին վերաբերող հարցեր:

Հանդիպումէն ետք երեսփոխան Բագրատունի յայտնեց, որ Լիբանանի մէջ տիրող քաղաքական սառած իրավիճակը, տնտեսական եւ ընկերային աղէտն ու դժուարութիւններու եւ փորձանքներու կուտակումը Այն Թինէ այցելելուս հիմնական պատճառներն են: «Սակայն ցաւ ի սիրտ, եւ հակառակ խորհրդարանի նախագահին սովորութեան, այսօր կարելի չէ լաւատեսութեան մասին խօսիլ: Բայց եւ այնպէս կարելի է խօսիլ կամքին մասին` դիմագրաւել կարենալու տագնապները, որոնց լուծման կարեւորագոյն կէտը կեցուածքները վերատեսութեան ենթարկելու կարողութիւնն է: Այս բոլորը պիտի նպաստեն ժողովուրդին ծառայելու, յատկապէս երկրին ապագան տեսնելու: Բոլորը գիտեն, որ մենք անդունդի սեմին չենք գտնուիր, այլ վիհին մէջ, իսկ քանդումը ամբողջական է: Համոզուած ենք, որ իւրաքանչիւրին իր խիղճին վերադառնալու ժամանակն է արդէն: Բոլորը պէտք է վերատեսութեան ենթարկեն իրենց հաշիւները եւ երկրին ու հայրենիքին շահերը ամէն բանէ եւ ամէն խմբաւորումէ վեր դասեն: Այսօր քաղաքական շահերու եւ պահու շահերու ժամանակը չէ, որովհետեւ եթէ մենք հայրենիքը կորսնցնենք, ապա քաղաքացիները պիտի կորսնցնենք, իսկ երբ քաղաքացին կորսնցնենք, ապա ո՛չ ես եւ ո՛չ ալ ուրիշը կրնայ Լիբանանի ապագային մասին խօսիլ:

«Մենք կ՛ուզենք երկիր մը, որպէսզի կարենանք իշխել, եւ պահանջուածը այն չէ, որ իշխենք` երկրի քանդումին շարունակութիւնը ապահովելու: Իբրեւ ՀՅԴ Լիբանանի Կեդրոնական կոմիտէ եւ Հայկական երեսփոխանական պլոք կոչ կ՛ուղղենք քաղաքական բոլոր ուժերուն թէկուզ վայրկեանի մը համար վերադառնալու իրենց խիղճին` ի խնդիր ժողովուրդին, ի խնդիր մեր զաւակներուն, թոռներուն` մտածելով Լիբանանի ապագային մասին: Ապագան, որ կը գտնուի տակաւին յոյսեր ունեցող մեր զաւակներուն եւ երիտասարդներուն ձեռքերուն մէջ:

«Բայց, նախ մենք կը ստանձնենք Լիբանանի պահպանման նպատակով պայքարելու պատասխանատուութիւնը: Լիբանան կարիքը ունի բոլորիս ձեռքերուն, ինչպէս նաեւ կարիքը ունի քաղաքական բոլոր տարակարծութիւնները մէկդի դնելու` սկսելու համար երկրին յարութեան ու փրկութեան մասին խօսելու հոլովոյթին», ընդգծեց Յ. Բագրատունի:

LEAVE A REPLY

Please enter your comment!
Please enter your name here