Հայաստանի Եւ Ռուսիոյ Արտաքին Գործոց Նախարարները Անդրադարձած Են Շրջանին Մէջ Անվտանգութեան Ապահովման Հարցերուն

0
510

Հայաստանի արտաքին գործոց նախարար Արա Այվազեան 18 յունուարին հեռաձայնային հաղորդակցութիւն ունեցած է Ռուսիոյ արտաքին գործոց նախարար Սերկէյ Լաւրովի հետ:

Հայաստանի արտաքին գործոց նախարարութեան լրատուութեան եւ հանրային դիւանագիտութեան վարչութենէն կը տեղեկացնեն, որ շարունակելով վերջերս տեղի ունեցած հեռաձայնային հաղորդակցութիւններու շարքը` նախարարները անդրադարձած են շրջանին մէջ կայունութեան հաստատման եւ անվտանգութեան ապահովման հարցերուն: «9 նոյեմբերի եւ 11 յունուարի եռակողմանի յայտարարութիւններու կեանքի կոչման ծիրին մէջ նախարար Այվազեան անգամ մը եւս ընդգծեց մարդասիրական հարցերու լիարժէք իրականացման, նախ եւ առաջ` ռազմագերիներու, պատանդներու եւ պահուող այլ անձերու անյապաղ եւ անվտանգ հայրենադարձման առաջնահերթութիւնը:

Նախարար Այվազեան զրուցակիցին ուշադրութիւնը հրաւիրեց Արցախի` ազրպէյճանական վերահսկողութեան տակ յայտնուած տարածքներուն մէջ հայկական կրօնական եւ պատմամշակութային ժառանգութեան պահպանման եւ այդ գործին մէջ միջազգային մասնագիտական կառոյցներու անխափան ներգրաւուածութեան կարեւորութեան վրայ:

Զրուցակիցները միտքեր փոխանակեցին նաեւ երկկողմանի եւ բազմակողմանի ձեւաչափերով հայ-ռուսական օրակարգին շուրջ», նշուած է հաղորդագրութեան մէջ:

LEAVE A REPLY

Please enter your comment!
Please enter your name here