Մարդու Իրաւունքներու Պաշտպանը Գերիներու Հարցով Դիմեց Մինսկի Խմբակի Համանախագահներուն

0
316

ԵՐԵՒԱՆ, «Ազատութիւն».- Հայաստանի Մարդու իրաւունքներու պաշտպան Արման Թաթոյեան 18 յունուարին պաշտօնական նամակով դիմեց ԵԱՀԿի Մինսկի խումբի համանախագահներուն ու ԵԱՀԿ գործող նախագահի անձնական ներկայացուցիչ, դեսպան Անճէյ Քասփըրչիքին՝ Ատրպէյճանէն գերիներու վերադարձին եւ անոնց իրաւունքներու պաշտպանութեան հարցով:

Վերոնշեալ նամակին մէջ, այլ հարցերու կողքին, կ՛ըսուի, որ գերիներու վերադարձը կամ ազատ արձակումը պէտք է դիտարկուի բացառապէս մարդու իրաւունքներու կամ մարդասիրական գործընթացի ծիրին մէջ:

Նամակը կը վերաբերի թէ՛ զինուորական ծառայողներուն եւ թէ քաղաքացիներուն։

«Գերիների վերադարձը պէտք է ապահովուի ռազմական գործողութիւնների դադարից անմիջապէս յետոյ: Սա աւտոմատ (ինքնաշխատ-Խմբ.) կիրառման ենթակայ միջազգային գործողութեան համընդհանուր պահանջ է: Հակառակն անելը ոտնահարում է մարդու իրաւունքների միջազգային պահանջները եւ միջազգային մարդասիրական իրաւունքը, այդ թւում` Ժնեւի 1949թ. երրորդ կոնվենցիան (պայմանագիրը-Խմբ.): Ուստի, 2020 թուականի Նոյեմբերի 9ի եռակողմ յայտարարութեան 8րդ կէտն ունի ինքնավար նշանակութիւն ու պէտք է գործի բացառապէս ինքնավար մեկնաբանութեամբ: Այն որեւէ պարագայում չի կարելի դիտարկել յայտարարութեան միւս կէտերի հետ կապի կամ կախուածութեան մէջ», կ՛ըսուի նամակին մէջ:

Ըստ Արման Թաթոյեանի` սկզբունքային կարեւորութեան հարց է այն, որ 64 հայ զինուոր գերիներու վերադարձը կը ձգձգուի` իրաւական գործընթացներու չարաշահումով, անոնց արհեստականօրէն տալով կասկածեալի կամ մեղադրեալի կարգավիճակ, ներկայացնելով` իբրեւ ահաբեկիչներ եւ բանտարկութեան ձեւով անազատութեան մէջ պահելը օգտագործելով` իբրեւ պատիժ:

Հայաստանի մարդու իրաւունքներու պաշտպանի ուսումնասիրութիւնները եւ բողոքներու քննութեան արդիւնքները շարունակաբար կը հաստատեն, որ Ատրպէյճանի մէջ արհեստական կերպով կը ձգձգեն հայկական կողմի գերիներուն ու այլ ձեւով բանտարկուած անձերուն ազատ արձակումը եւ չեն յայտներ գերիներու իրական թիւը:

«Սա նոյնպէս մարդու իրաւունքների պաշտպանութեան միջազգային պահանջներին հակասում է, այն ոտնահարում է առաջին հերթին նրանց ընտանիքների անդամների իրաւունքները։ Աւելին, Մարդու իրաւունքների պաշտպանի աշխատակազմի հաւաքագրած ապացոյցները հաստատում են, որ նրանց թիւն աւելի շատ է, քան ադրբեջանական իշխանութիւնները հաստատել են: Դա վերաբերում է նաեւ մինչեւ 44 գերիների վերադարձին», կ՛ըսուի Արման Թաթոյեանի նամակին մէջ:

LEAVE A REPLY

Please enter your comment!
Please enter your name here