Արցախի ԱԳՆ Ողջունեց Ղարաբաղի Տագնապին Վերաբերեալ Եւրոպական Խորհրդարանին Դիրքորոշումը

0
527

ՍՏԵՓԱՆԱԿԵՐՏ, «Արմէնփրէս».- Արցախի Հանրապետութեան արտաքին գործոց նախարարը մեկնաբանութիւն տարածեց 20 յունուարին Եւրոպական խորհրդարանին կողմէ «Ընդհանուր արտաքին եւ անվտանգութեան քաղաքականութեան» եւ «Ընդհանուր անվտանգութեան եւ պաշտպանութեան քաղաքականութեան» շուրջ բանաձեւերու-տարեկան հաշուետուութիւններու ընդունման վերաբերեալ` գոհունակութիւն յայտնելով Եւրոպական խորհրդարանին կողմէ ատրպէյճանական-ղարաբաղեան հակամարտութեան վերաբերեալ արտայայտուած դիրքորոշման վերաբերեալ:

«Կիսում ենք Եւրախորհրդարանի գնահատականները` Ադրբեջանի կողմից ռազմական ուժի կիրառման հետեւանքով տեղի ունեցած իրադարձութիւնների, ինչպէս նաեւ ստեղծուած իրավիճակից դուրս գալու ուղիների վերաբերեալ: Մասնաւորապէս` հարկ ենք համարում յատուկ ընդգծել Եւրախորհրդարանի տեսակէտը` Լեռնային Ղարաբաղում հայ բնակչութեան անվտանգութեան ապահովման, հայկական մշակութային ժառանգութեան պահպանման, իրենց նախկին բնակութեան վայրերից տեղահանուած անձանց եւ փախստականների անվտանգ վերադարձի, ռազմագերիների եւ զոհուածների մարմինների` առանց յապաղելու փոխանակման անհրաժեշտութեան վերաբերեալ:

«Կարեւորում ենք բոլոր ենթադրեալ պատերազմական յանցագործութիւնները պատշաճ կերպով հետաքննելու եւ մեղաւորներին պատասխանատուութեան ենթարկելու անհրաժեշտութիւնը: Յատկանշական է, որ Եւրոպական խորհրդարանը նաեւ առանձին կոչ է արել միջազգային հետաքննութիւն անցկացնել օտարերկրեայ զինեալների, ահաբեկիչների ենթադրեալ ներկայութեան եւ կասետային զինամթերքի ու ֆոսֆորային ռումբերի օգտագործման վերաբերեալ:

«Ողջունում ենք Եւրախորհրդարանի աջակցութիւնը ԵԱՀԿ Մինսկի խմբի համանախագահութեան ջանքերին` միջազգային միջնորդների առաջարկած հիմնարար սկզբունքների հիման վրայ հակամարտութեան համապարփակ կարգաւորման ուղղութեամբ: Միանում ենք Եւրախորհրդարանի կողմից Թուրքիայի ապակայունացնող դերի դատապարտմանը, որը փորձում է խափանել ԵԱՀԿ Մինսկի խմբի ջանքերը` յանուն հակամարտութեան կարգաւորման գործընթացում առաւել որոշիչ դեր խաղալու իր ձգտումների: Կիսում ենք Եւրախորհրդարանի տեսակէտն առ այն, որ տեւական կարգաւորում դեռեւս չի գտնուել: Համոզուած ենք, որ ադրբեջանա-ղարաբաղեան հակամարտութեան համապարփակ եւ արդարացի կարգաւորման կարելի է հասնել Արցախի ժողովրդի կողմից իրացուած ինքնորոշման իրաւունքի ճանաչման եւ Արցախի Հանրապետութեան տարածքների ապագրաւման հիման վրայ», կ՛ըսուի մեկնաբանութեան մէջ։

LEAVE A REPLY

Please enter your comment!
Please enter your name here