Ընթացիկ Հարցերու Կառավարութիւնը Կը Յայտարարէ Պատուաստումի Իր Ծրագիրին Մասին

0
300

Վարչապետարանին մէջ երէկ առաւօտեան սկսաւ ժողովներու շարք մը, որ աւարտեցաւ երեկոյեան:

Այդ նիստերէն ետք յայտարարուեցաւ կառավարութեան` Լիբանանի մէջ պատուաստումի ծրագիրը:

Նիստերուն ներկայ գտնուեցան ընթացիկ հարցերու կառավարութեան վարչապետ Հասսան Տիապ եւ նախարարի պաշտօնակատարներ Զէյնա Աքըր, Վարդինէ Օհանեան-Գէորգեան, Իմատ Հուպալլա, Միշել Նաժժար, Ռամզի Մշարրաֆիէ, Համատ Հասան, Թալալ Հաուաթ եւ Շարպել Ուեհպէ, ինչպէս նաեւ առողջապահական հարցերու խորհրդարանական յանձնախումբի նախագահ, երեսփոխան Ասեմ Արաժի, նախարարաց խորհուրդի ընդհանուր քարտուղար Մահմուտ Մաքքիէ, Պաշտպանութեան գերագոյն խորհուրդի ընդհանուր քարտուղար հազարապետ-զօրավար Մահմուտ Ասմար, «Քորոնա» ժահրին դէմ պատուաստումի ազգային յանձնախումբի նախագահ Ապտել Ռահման Պըզրի, ինչպէս նաեւ բժիշկներ, դեղագործներ, հիւանդապահներ, տարրալուծարաններու պատասխանատուներ, Լիբանանի Կարմիր խաչի, Առողջապահութեան միջազգային կազմակերպութեան, ԵՈՒՆԻՍԵՖ-ի, Միջազգային դրամատան եւ ՈՒՆԵՐՈՒԱ-ի ներկայացուցիչներ:

Առողջապահութեան նախարարի պաշտօնակատար Համատ Հասան ներկայացուց պատուաստումի ծրագիրը` հաստատելով, որ անոր նպատակն է 2021-ին ընթացքին լիբանանցիներուն 80 առ հարիւրը պատուաստել, որպէսզի կարելի ըլլայ համաճարակին տարածումը հաւասարակշռել եւ լիբանանցիները փրկել: Ան աւելցուց, որ առողջապահութեան նախարարութիւնը անվճար կերպով պիտի տրամադրէ պատուաստը լիբանանցիներուն:

Իր կարգին, Ապտել Ռահման Պըզրի յայտնեց, որ պատուաստումին նպատակն է ընկերութիւնը պաշտպանել այդ համաճարակէն:

Ասեմ Արաժի նկատել տուաւ, որ պատուաստումը չի նշանակեր, որ «Քորոնա» համաճարակին նախազգուշական քայլերը պէտք է մեղմացնել:

Հասսան Տիապ նախագահեց նաեւ «Քորոնա»-ի համաճարակին դէմ պայքարող պետական շտապի նիստին, որուն ընթացքին հաստատեց, որ առողջապահական շտապի ծրագիրը պէտք է անմիջապէս գործադրել:

Տիապ հաստատեց, որ ոչինչ կ՛արգիլէ երկրին ամբողջական փակումին երկարաձգումը, եթէ վարակուածներուն թիւը յաւելեալ աճ արձանագրէ: Ան ընդգծեց առողջապահական եւ տնտեսական կացութիւնները հաւասարակշռելու կարեւորութիւնը:

Յայտնենք, որ երեկոյեան Տիապ նախագահեց այլ նիստի մը, որուն ընթացքին որոշուեցաւ արագացնել կարիքաւոր ընտանիքներուն համար 400 հազար լ. ոսկիի հատուցման փոխանցումը:

Նշենք, որ հանրապետութեան նախագահ զօր. Միշել Աուն թուիթըրեան գրառումի մը ընդմէջէն հաստատեց, որ «Քորոնա»-ի դէմ պատուաստումի ծրագիրի մեկնարկումին առընթեր կը հաստատէ, որ ամէն ջանք ի գործ պիտի դրուի պատուաստները կարելի եղածին չափ մեծ թիւով լիբանանցիներու տրամադրելու` ամէնէն մօտիկ ապագային, որպէսզի կարելի ըլլայ պաշտպանութեան աշխուժ միջոցներ ապահովել` այս համաճարակին դէմ:

Երէկ երեկոյեան առողջապահութեան նախարարութեան հրապարակած յայտարարութիւնը հաստատեց, որ անցնող 24 ժամուան ընթացքին Լիբանանի մէջ արձանագրուած են 3906 նոր վարակուածներ եւ 76 մահացածներ:

LEAVE A REPLY

Please enter your comment!
Please enter your name here