Արտաքին Գործոց Նախարարութեան Մեկնաբանութիւնը՝ Հայ Դատի Յայտարարութեան

0
338

ԵՐԵՒԱՆ.- Հայաստանի արտաքին գործոց նախարարութեան մամլոյ խօսնակ Աննա Նաղտալեան 11 Փետրուարին ՀՅԴ Հայ Դատի Կեդրոնական խորհուրդին հրապարակած յայտարարութեան վերաբերեալ հետեւեալ մեկնաբանութիւնը տարածեց.

«Այսօր ՀՅԴ Հայ Դատի Կենտրոնական խորհուրդը հանդէս է եկել յայտարարութեամբ, որտեղ հնչեցուել են մտահոգութիւններ տարածաշրջանային հարցերի, մասնաւորապէս Թուրքիայի հանդէպ Հայաստանի մօտեցումների վերաբերեալ:

«Նախ եւ առաջ կ՛ուզենայինք շեշտել, որ բարձր ենք գնահատում Հայ Դատի գրասենեակների եւ յանձնախմբերի հետ Հայաստանի արտաքին գործերի նախարարութեան համագործակցութիւնը, որը մշտապէս միտուած է եղել համահայկական օրակարգի առաջմղմանը:

«ՀՅԴ Հայ Դատի Կենտրոնական խորհրդի յայտարարութեան մէջ տեղ գտած մտահոգութիւնները հիմնուած են նախարար Այվազեանի՝ Ազգային ժողովում կառավարութեան հետ հարցուպատասխանի ժամանակ հնչեցուած խօսքերի մեկնաբանութիւնների վրայ: Այդ մեկնաբանութիւնները կամ, ինչպէս դրանք ձեւակերպուած են՝ «հաստատումները», կատարուած են ընդհանուր համատեքստից դուրս եւ որեւէ կերպ չեն արտացոլում ՀՀ գնահատականը եւ մօտեցումները Թուրքիայի՝ տարածաշրջանում ներգրաւման առնչութեամբ:

«Հայաստանը որեւէ կերպ չի վերանայել տարածաշրջանում Թուրքիայի ապակառուցողական ներգրաւման վերաբերեալ իր գնահատականը, եւ այդ իսկ հարցուպատասխանի մէջ յստակօրէն նշուած էին այդ մտահոգութիւնները, մասնաւորապէս՝ Հայաստանի սահմանին մօտ թուրք-ադրբեջանական համատեղ զօրավարժութիւններ իրականացնելու մասով: Միեւնոյն ժամանակ ՀՀ ԱԳ նախարարն անդրադարձել է Թուրքիայի կողմից Հայաստանն ապօրինի շրջափակելու քաղաքականութեանը՝ պնդելով, որ ներկայումս գոյութիւն չունի անգամ այն պատրուակը, որի վրայ յղում կատարելով՝ Թուրքիան տասնամեակներ շարունակ փակել է իր սահմանը Հայաստանի հետ:

«Հարկ է նշել, որ Հայաստանի բոլոր կառավարութիւնները, ինչպէս նաեւ սփիւռքահայ առաջատար կազմակերպութիւնները, մշտապէս համարել են շրջափակումն ապօրինի եւ հանդէս են եկել դրա դադարեցման դիրքերից:

«Հայաստանի դիրքորոշումն այս հարցում որեւէ փոփոխութիւն չի կրել, ինչպէս չի կրել Հայաստանի արտաքին քաղաքականութեան գերակայութիւնները հետապնդելու հաստատակամութիւնը: Վստահ ենք, որ Թուրքիայի ուղղակի ներգրաւուածութիւնը Ադրբեջանի կողմից Արցախի ժողովրդի դէմ սանձազերծուած պատերազմում, Արցախի ժողովրդի նկատմամբ իրականացուած պատերազմական յանցագործութիւնները եւ այլ զանգուածային ոճրագործութիւններն առաւել այժմէական են դարձնում Հայոց Ցեղասպանութեան միջազգային ճանաչումը եւ դատապարտումը՝ նմանօրինակ միջազգային ոճիրների կանխարգելման եւ չկրկնման նպատակով:

«Այս հարցում Հայաստանն շարունակելու է իր սերտ համագործակցութիւնը սփիւռքահայ հեղինակաւոր կազմակերպութիւնների հետ:

«Միեւնոյն ժամանակ հարկ ենք համարում ընդգծել, որ տարբեր առիթներով ՀՀ ԱԳ նախարարը նշել է, որ դիտարկելու ենք ոչ թէ Թուրքիայից հնչող յայտարարութիւնները, այլ գործողութիւնները: Այդ գործողութիւնները մինչ օրս չեն եղել կառուցողական:

«Այս առումով կը ցանկանայինք նաեւ մէջբերել ՀՀ ԱԳ նախարարի՝ նոյն հարցուպատասխանի ժամանակ արտայայտած դիրքորոշումը, որ «Հայաստանի, մեր դիւանագիտութեան, մեր ժողովրդի համար պէտք է մեր շուրջ ձեւաւորել բարենպաստ մթնոլորտ, բնականաբար, չխախտելով կարմիր գծերը եւ պաշտպանելով մեր պետական եւ ազգային շահերը»:

LEAVE A REPLY

Please enter your comment!
Please enter your name here