Այվազեան Եւ ԱՊԿի Ընդհանուր Քարտուղարը Շեշտեցին Ռազմագերիներու Վերադարձի Հրատապութիւնը

0
148

ԵՐԵՒԱՆ, «Արմէնփրէս».- Հայաստանի արտաքին գործոց նախարար Արա Այվազեան 19 Փետրուարին հեռաձայնային զրոյց մը ունեցաւ Ամերիկեան պետութիւններու կազմակերպութեան ընդհանուր քարտուղար Լուիս Ալմակրոյի հետ:

Հայաստանի արտաքին գործոց նախարարութեան լրատուութեան եւ հանրային դիւանագիտութեան վարչութենէն կը տեղեկացնեն, որ զրուցակիցները գոհունակութիւն յայտնեցին Հայաստանի եւ Ամերիկեան պետութիւններու կազմակերպութեան միջեւ ձեւաւորուած հեռանկարային համագործակցութեան առնչութեամբ: Ընդգծուեցաւ երկկողմանի ջանքերը շարունակելու պատրաստակամութիւնը, փոխգործակցութեան ներկայի աշխուժութեան պահպանումը եւ երկխօսութեան աւելի ամրապնդումը, յատկապէս՝ մարդու իրաւունքներու պաշտպանութեան ծիրին մէջ:

Անդրադարձ կատարուեցաւ նաեւ տարածաշրջանային կայունութեան եւ խաղաղութեան հարցերուն: Նախարար Այվազեան իր զրուցակիցին ներկայացուց Արցախի մէջ Ատրպէյճանի սանձազերծած յարձակումին իբրեւ արդիւնք յառաջացած մարդկային խոցելի իրավիճակը: Իբրեւ առաջնահերթութիւն՝ Հայաստանի արտաքին գործոց նախարարը եւ ԱՊԿի ընդհանուր քարտուղարը շեշտեցին ռազմագերիներու եւ պատանդի կարգավիճակի մէջ գտնուող քաղաքացիական անձերու հայրենադարձման հրատապութիւնը:

Այվազեան նշեց, որ Հայաստան իսկապէս կ՛արժեւորէ Արցախի դէմ Ատրպէյճանի կողմէ սանձազերծուած պատերազմի ամբողջ ընթացքին կազմակերպութեան հետեւողական եւ հաւասարակշռուած դիրքորոշումը:

LEAVE A REPLY

Please enter your comment!
Please enter your name here