Յայտարարութիւն՝ Արցախի Վերածնունդի Օրուան Առիթով

0
159

ՍՏԵՓԱՆԱԿԵՐՏ, «Արմէնփրէս».- Արցախի Հանրապետութեան արտաքին գործոց նախարարութիւնը Արցախի վերածնունդի օրուան առիթով հրապարակեց հետեւեալ յայտարարութիւնը.

«Արցախեան ազգային-ազատագրական պայքարը հայ ժողովրդի պատմութեան ամենակարեւոր էջերից է: Ղարաբաղեան շարժումը պայքար էր յանուն պատմական արդարութեան, ազգային ինքնութեան եւ արժանապատուութեան պահպանման, քաղաքացիական իրաւունքների եւ համամարդկային արժէքների, պատմական հայրենիքում ազատ ապրելու եւ արարելու:

«Արցախահայութեան ժողովրդավարական, խաղաղ եւ օրինական կամարտայայտմանն ի պատասխան Ադրբեջանը փորձեց բռնութեան միջոցով ահաբեկել մեր ժողովրդին եւ ստիպել նրան հրաժարուել իր իրաւունքների իրացման հարցադրումից: Ադրբեջանական իշխանութիւնների կազմակերպմամբ Սումգայիթում, Բաքւում եւ Ադրբեջանի հայաշատ այլ քաղաքներում, ինչպէս նաեւ Հիւսիսային Արցախի բնակավայրերում իրականացուեցին հայ բնակչութեան ցեղասպանութիւն, ջարդեր եւ զանգուածային տեղահանումներ: Հազարաւոր մարդիկ զոհուեցին ու վիրաւորուեցին, աւելի քան կէս միլիոն հայ դարձաւ փախստական: Արցախի խաղաղ բնակչութիւնը նոյնպէս դարձաւ Ադրբեջանի լայնածաւալ ռազմական յարձակման թիրախ:

«Արցախահայութիւնը, սակայն, միաւորուեց եւ թիկունքում ունենալով աշխարհասփիւռ հայութեան աջակցութիւնը՝ կարողացաւ իրեն պարտադրուած պատերազմում պաշտպանել իր պատմական հայրենիքում ազատ ապրելու իրաւունքը եւ կերտել անկախ պետականութիւն՝ Արցախի Հանրապետութիւնը:

«Արցախի ժողովրդի ինքնորոշման անքակտելի իրաւունքին բռնանալու եւ ադրբեջանա-ղարաբաղեան հակամարտութիւնն ուժի միջոցով լուծելու Ադրբեջանի իշխանութիւնների հերթական փորձն էր 2020թ. Սեպտեմբերի 27ին Արցախի Հանրապետութեան դէմ սանձազերծուած զինուած յարձակումը, որն ուղեկցուեց բազմաթիւ պատերազմական յանցագործութիւններով, միջազգային մարդասիրական իրաւունքի կանոնների կոպտագոյն խախտումներով եւ զգալի մարդկային կորուստներով:

«Չնայած այդ արհաւիրքներին, Արցախը կանգուն է: Այս խորհրդանշական օրը մենք խոնարհւում ենք հայրենիքի պաշտպանների եւ ազգի նուիրեալների առջեւ, ոգեկոչում մեր բոլոր մարտիրոսների յիշատակը:

«Կեցցէ՛ ազատ եւ անկախ Արցախը»:

LEAVE A REPLY

Please enter your comment!
Please enter your name here