Հաղորդագրութիւն. Համազգայինի Լիբանանի Շրջանային Վարչութիւնը Այցելեց Արամ Ա. Վեհափառին

0
342

Համազգայինի Լիբանանի Շրջանային վարչութիւնը hինգշաբթի, 11 մարտ 2021-ին այցելեց Արամ Ա. կաթողիկոսին:

Շուրջ մէկ ժամ տեւած հանդիպման ընթացքին, նախ եւ առաջ Շրջանային վարչութեան ատենապետը շնորհաւորեց վեհափառ հայրապետին ծննդեան տարեդարձը` մաղթելով, որ հայրապետական ասան մնայ միշտ ծաղկեալ: Համազգայինի Լիբանանի Շրջանային վարչութեան ատենապետը շեշտեց, թէ անցնող 25 տարիներու ընթացքին Համազգայինի կապերը Կիլիկիոյ Սուրբ աթոռին հետ մնացին մնայուն ու հետեւողական:

Շրջանային վարչութեան ատենապետը նաեւ իր որդիական երախտագիտութիւնը եւ խորին շնորհակալութիւնը յայտնեց վեհափառ հօր, որովհետեւ Համազգայինը միշտ ալ վայելած է Արամ Ա. կաթողիկոսին հայրական գուրգուրոտ վերաբերմունքը եւ զօրակցութիւնը, որոնք խթան հանդիսացած են վարչութեան` նոր եռանդով շարունակելու իրեն վստահուած աշխատանքը եւ առաքելութիւնը:

Ապա վեհափառ հօր ներկայացուեցան Հայոց ցեղասպանութեան 106-ամեակին մեր մէկուկէս միլիոն սրբադասուած նահատակներու յիշատակին կայանալիք ձեռնարկին մանրամասնութիւնները: Շրջանային վարչութիւնը շնորհակալութիւն յայտնեց վեհափառ հայրապետին` սոյն ձեռնարկին հովանաւորութեան համար:

Հանդիպումին արծարծուեցան նաեւ Լիբանանի մէջ մշակութային կեանքը յուզող հարցեր: Վեհափառ հայրապետը ծանօթացաւ Համազգայինի առցանց գործունէութեան, այսօրուան նիւթական ու տնտեսական դժուարութիւններուն պատճառով Համազգայինի Շրջանային վարչութեան դիմագրաւած մարտահրաւէրներուն եւ այս ուղղութեամբ մշակուած ծրագիրներուն ու ցարդ կատարուած նախաձեռնութիւններուն:

Արամ Ա. կաթողիկոս յաջողութիւն մաղթեց  Համազգայինի Լիբանանի Շրջանային վարչութեան տարած ազգանուէր եւ օգտաշատ ծառայութեան` շեշտը դնելով մշակոյթի կարեւորութեան վրայ, որովհետեւ մշակոյթը ժողովուրդի մը ինքնութեան արտայայտութիւնն է եւ գոյութեան հիմքը: Վեհափառ հայրապետը աւելցուց, որ առանց մշակոյթի ժողովուրդ չի կրնար ըլլալ  եւ գոյատեւել` աւելցնելով, որ  քրիստոնէութեան յատկանշական երեւոյթներէն մէկը այն է, որ ան մշակոյթի մէջ ըլլալով մշակոյթի ճամբով ինքզինք արտայայտեց: Վեհափառ հայրապետը եզրափակեց իր խօսքը հաստատելով, որ մշակոյթը կարեւոր դեր ունեցաւ մեր ինքնութեան հարստացման  եւ հզօրութեան մէջ:

Հանդիպման աւարտին վեհափառ հօր յանձնուեցաւ Համազգայինի Գեղարուեստի դպրոցներու «Թորոս Ռոսլին» կերպարուեստի ակադեմիայի ուսուցիչներէն արուեստագէտ Գէորգ Ուլաշեանի կողմէ տրամադրուած արուեստի գործ մը` կաթողիկոսարանի արուեստի հաւաքածոյին համար:

ՀԱՄԱԶԳԱՅԻՆԻ ԼԻԲԱՆԱՆԻ ՇՐՋԱՆԱՅԻՆ ՎԱՐՉՈՒԹԻՒՆ

LEAVE A REPLY

Please enter your comment!
Please enter your name here