«Դէպի Հայրենիք Եւ Դէպի Սփիւռք Մտահոգութիւնները Հաւասարակշռելը Հրամայական Է. Նոր Յարացոյցի Որդեգրումը Անհրաժեշտ Է» Կ՛ըսէ Փրոֆ. Հայկ Օշական

0
358

Երէկ` ուրբաթ, 9 ապրիլի երեկոյեան ժամը 7:00-ին տեղի ունեցաւ «Ազդակ»-ի 27-րդ առցանց լսարանը: Դասախօսն էր փրոֆ. Հայկ Օշական: Նիւթ` «Սփիւռք. ինքնութիւն եւ վերադարձ»: Լսարանը վարեց «Ազդակ»-ի ելեկտրոնային բաժնի աշխատակից Մինաս Հանս Քէհեան:

Փրոֆ. Օշական նախ յստակացուց, որ դասախօսութիւնը ակադեմականէն աւելի մտահոգութիւններու տեսական-դիտական ներկայացում մըն է այսօրուան սփիւռքեան իրավիճակին:

Ան հաստատեց, որ սփիւռքի դէպի հայրենիք վերադարձ չկայ` նկատի ունենալով թուային պատկերը եւ սփիւռքեան ժամանակի վրայ տարածուող իրականութիւնը: Սփիւռքի ժամանցելիութեան տեսութիւնը կազմուած է սփիւռքի հիմնադիրներու մտածողութեան հիման վրայ, ինչպէս նաեւ` կուսակցութիւններու ազգայնական գաղափարախօսութեան:

Հայկ Օշական ցոյց տալով «Ազդակ»-ի առցանց լսարանը ընդգծեց, որ այժմ, երբ աշխարհի տարբեր երկիրներէ աւելի քան 40 մտաւորականներ նոյն հարթակին վրայ կը քննարկեն բոլորը յուզող խնդիրները, այդ կը նշանակէ, որ աշխարհագրական միջավայրը այս պարագային երկրորդական է:

Սփիւռքի մնայուն ըլլալու հանգամանքը շեշտելէ ետք, դասախօսը հաստատեց, որ սփիւռքի քարտէսին վրայ յարափոփոխ տեղաշարժեր կ’արձանագրուին: Եթէ գաղութ մը կը տկարանայ, այլ գաղութ մը կ’ուժեղանայ մարդոց հոսքին իբրեւ հետեւանք:

Մեր հաւաքական մօտեցումը չէ նպաստած սփիւռքի զարգացման: Կը նշմարուի լճացում: Եւ անհրաժեշտութիւնը կայ նորացուած ազգայնականութիւն մը ձեւաւորելու: Ազգայնականութիւն մը, հայեցակարգ մը, որ Հայաստանի Հանրապետութեան խնդիրները կարեւոր նկատելու առընթեր կարեւոր նկատէ նաեւ սփիւռքի խնդիրները: Իսկ այս առումով ազգի գաղափարը կամրջող հանգամանք կրնայ ունենալ` նկատի ունենալով մանաւանդ այն, որ ազգի համրանքին երեք չորրորդը Հայաստանի Հանրապետութենէն դուրս կ’ապրի:

«Դէպի հայրենիք եւ դէպի սփիւռք մտահոգութիւնները հաւասարակշռելը հրամայական է: Նոր յարացոյցի որդեգրումը անհրաժեշտ է», եզրակացուց փրոֆ. Հայկ Օշական:

Դասախօսութեան հետեւեցաւ բանավէճ-քննարկում` մասնակցութեամբ սփիւռքագէտներու, հասարակական գործիչներու եւ վերլուծական կեդրոններու ղեկավարներու:

LEAVE A REPLY

Please enter your comment!
Please enter your name here