ՆՇՄԱՐ. Առանց Յենակի…

0
172

Ս. ՄԱՀՍԷՐԷՃԵԱՆ

Հայաստանի պատկերասփիւռի կայանէ մը 19 Ապրիլին հաղորդուեցաւ հետեւեալ լուրը:

Տարի մը առաջ, Ապրիլի վերջերուն, ինքնաշարժի արկածի մը հետեւանքով, Վահէ անունով մանչուկ մը, ծանրօրէն վիրաւորուած (վտանգաւոր այրուցքներով), հիւանդանոց փոխադրուած է: Անոնց ընտանեկան ինքնաշարժը ճամբէն դուրս եկած էր եւ փոսի մը մէջ ինկած. ամէնէն ծանր վնասները կրած էր Վահէն:

Առաջին ակնարկով, բժիշկներ ու մասնագէտներ մանուկին վիճակը նկատած են անյոյս, սակայն մայրն ու այլ բժիշկներ յոյսը չեն կտրած: Տարի մը ետք, շնորհիւ բժիշկներուն մասնագիտական խնամքին եւ մօր անսասանելի հաւատքին, հիմա 8 տարեկան Վահէն արդէն ոտքի կանգնած է եւ նոյն օրը, քալելով (յենակի մը կռթնած) տուն վերադարձած է: Ան տակաւին կարիքն ունի յաւելեալ խնամքի, սկսելու համար՝ ձայնալարերուն վերականգնումին: Դարմանողները վստահաբար ուրախ են եւ վարձատրուած կը զգան (առանց… պարգեւավճարի):

Հաղորդավարը նկատել տուաւ, որ մանուկին դէմքին վրայ մէկ տարիէ ի վեր առաջին անգամ ըլլալով ժպիտ մը ուրուագծուած է…:

***

Աւելի քան 6 ամիս առաջ, Հայաստան-Արցախ հայրենիքը ահաւոր արկածի մը մատնուեցաւ եւ ինկաւ թուրք-ազերիներուն սանձազերծած պատերազմին փոսին մէջ: Հայրենիքը ունեցաւ ծանր վնասներ՝ զոհեր, վիրաւորներ եւ քանդումներ:

Մեր հայրենիքին վիճակը բաւական նման է Վահէ անուն մանուկին: Անիկա կը կարօտի մայրական խնամքի (Հայաստանէն եւ Սփիւռքէն), քաջալերանքի, ՄԱՍՆԱԳԻՏԱԿԱՆ ԴԱՐՄԱՆՈՒՄի:

Վահէն մէկ տարուան պէտք ունեցաւ, որպէսզի կարենայ ոտքերուն վստահելով տուն վերադառնալ: Հայրենիքը հաւանաբար աւելի ժամանակի պիտի կարօտի, սակայն անկասկած որ պիտի վերականգնի եւ իր ուղին պիտի շարունակէ առանց յենակի…

19 Ապրիլ 2021

LEAVE A REPLY

Please enter your comment!
Please enter your name here