Ալիեւ Կը Սպառնայ «Ոչնչացնել» Հադրութը Եւ Շուշին Վերադարձնելու Մասին Խօսողները

0
365

ՊԱՔՈՒ․- «40 քիլոմեթրնոց Զանգեզուրի միջանցքը, որ մեզ Նախիջեւանէն կը բաժնէ, պիտի բացուի», «Ազ Թի.Վի.» պետական պատկերասփիւռի կայանին հետ հարցազրոյցի մը ընթացքին յայտարարեց Ատրպէյճանի նախագահ Իլհամ Ալիեւ՝ նշելով, որ միջանցքին բացումը եռակողմ յայտարարութեան կէտերէն մէկն է:

«Փաստաթուղթը ստորագրելէ ետք Ատրպէյճանի, Հայաստանի եւ Ռուսիոյ փոխվարչապետներու մակարդակով աշխատանքային խումբը այդ հարցին շուրջ շատ լուրջ քայլերու ձեռնարկեց: Վստահաբար կրնամ ըսել` երկաթուղային միջանցքը պիտի բացուի: Ատրպէյճան պիտի կատարէ իր բոլոր պարտաւորութիւնները», ըսաւ ան` աւելցնելով, որ «Ռուսական երկաթուղիներ»ը Հայաստանի երկաթուղիներու սեփականատէրն է, այդ պատճառով Պաքուն այդ հարցը ռուսական կողմին հետ կը քննարկէ:

Ան նաեւ կոչ ուղղեց հրաժարելու Արցախի մէջ վրէժխնդրութեան ծրագիրներէն, ազդարարելով, որ հակառակ պարագային` այդ վրէժխնդրական ուժերը պիտի կործանին: «Ոչ ոք պիտի կարենայ զանոնք պաշտպանել: Թող անոնք ոչ մէկուն վրայ յոյս դնեն», ըսաւ Ալիեւ:

«Կը հետեւինք բոլոր յայտարարութիւններուն: Հայաստանի մէջ թէ՛ իշխանութիւնները, թէ՛ ընդդիմութիւնը եւ թէ բոլոր անոնք, որոնք կը զբաղին քաղաքականութեամբ, կը բարձրաձայնեն Հադրութը, Շուշի քաղաքը վերադարձնելու մասին: Մենք տակաւին զսպուածութիւն կը ցուցաբերենք: Սակայն ես անոնց կը յորդորեմ կրակի հետ չխաղալ: Անոնք տեսան մեր բռունցքը: Այս բռունցքը իր տեղն է: Ոչ ոք կրնայ մեզի դիմադրել: Եթէ տեսնենք ամէնէն փոքր վտանգը, անոնք անմիջապէս պիտի ոչնչացուին», սպառնաց Ալիեւ։

LEAVE A REPLY

Please enter your comment!
Please enter your name here