ՀԵՐՈՍԱԿԱՆ ՊԱՂԵՍՏԻՆ (320)

0
211
Յակոբ Միքայէլեան
Մենք, աշխարհագարականօրէն մօտիկ ըլլալով Պաղեստինին եւ ամէն օր ապրելով պաղեստինցի ժողովուրդին ողբերգութիւնը, աւելի քան յիսուն տարիէ ի վեր, երբ 1965-ին մէջտեղ եկաւ «Ֆաթըհ» Պաղեստինեան զինեալ պայքարի կազմակերպութիւնը, գլխաւորութեամբ Եասէր Արաֆաթի, ականջալուր եւ ականատես կ՛ըլլանք Արաբ- Իսրայէլեան բախումներուն:
«Բախումներ» բառը չի կրնար ճշգրիտ պատկերացումը տալ առճակատումներուն, մինչեւ որ մարդ իր աչքերով չտեսնէ թէ ի՞նչ կը կատարուի, երբ քար մը ձեռքին պաղեստինցի պատանին կը քարկոծէ իսրայէլեան զինուորական զրահապատ մեքենան, մինչ իսրայէլացի զինուորը ամենաարդիական արագահարուածը ձեռքին, քարին կը պատասխանէ փամփուշտով, երբեմն ձգախեժէ, երբեմն ալ կապարէ:
Տասնամեակներ շարունակ անոնք քարերով պայքարեցան, դիմացինները զէնքով ու ամէն ընդհարումէ ետք, իսարյէլացի զինուորները գրեթէ անվնաս քաշուեցան, մինչ պաղեստինցիները իրենց զոհուածներուն դիակները վերամբարձ, անէծքներ տեղացնելով թշնամիին հասցէին, լոզունգներով ու կոչերով թաղեցին իրենց նահատակները, իսկ ձերրակալուածները լեցուեցան իսրայէլեան բանտերը:
Դեռ աչքիս առջեւն է այն քստմնելի տեսարանը, ուր քարկոծող պատանի մը բռնած հրեայ զինուորը տղեկին բազուկի ոսկորները կը կոտրտէր մետաղեայ ձողով մը հարուածելով…
Այսպէս կը պատասխանէին իսրայէլացիք արաբներուն, վայրագօրէն, ամենաանմարդկային ձեւերով: Հակառակ բոլոր նահատակներուն եւ թշնամիի բանտերուն մէջ հիւծուողներուն, պաղեստինցիներուն պայքարը կանգ չառաւ: Մարդիկը մեռնելէն չեն վախնար, նոյնիսկ իրենց մեռելները հարսանեկան «լիլիներով» ու կանչերով կը յուղարկաւորեն:
Եւ այսպէս ամբողջ 56 տարի… Բոլոր «պատժամիջոցները» զոր օգտագործեցին իսրայէլացիք, չյաջողեցան վախ սերմանել պաղեստինցի ժողովուրդին մէջ: Իսրայէլացիք հանգիստ չունէին, ու կարծեցին միակ միջոցը իրենց եւ պաղեստինեան բնակավայրերուն միջեւ պատ բարձրացնելն է: Այդ ալ ըրին, սակայն պայքարը կանգ չառաւ:
Իսրայէլ իրաւունք ունէր աթոմակայան ունենալու, աշխարհի չորրորդ ուժեղագոյն բանակը ունենալու, ամենաարդիական զէնքերն ու պաշտպանական համակարգերը ունենալու, մինչ Պաղեստինը իրաւունք չունէր բանակ ունենալու, միայն՝ ոստիկանութիւն. ամէն կենսական միջոց՝ ջուր, հոսանք, կազ… Իսրայէլի ձեռքին էին, շրջափակուած Կազան իրաւունք չունէր շնչելու առանց Իսրայէլի արտօնութեան:
ՄԱԿ-ի որոշումները ոչինչ արժէք ունին, երբ ի նպաստ չեն Իսրայէլին: ՄԱԿ-ը ոչ մէկ ոյժ կը բանեցնէ իր որոշումները պարտադրելու համար: Շրջափակումը կը խեղդէ պաղեստինը, ու անոնք ճարահատ կը դիմեն պայքարի: Պաղեստինցիներուն քարերը երբ ապարդիւն եղան, փոխարինուեցան իրենց պատրաստած հրթիռներով, որոնցմով սկսան հարուածել իսարյէլեան տարածքները, մասնաւորաբար անօրինական եւ անարդարօրէն պաղեստինեան գրաւեալ տարածքներուն վրայ նոր կառուցուող բնակատեղիները: Իսրայէլի պատասխանը անմիջական էր ու անհամեմատօրէն գերակշռող, անպայման շէնքեր քանդելով ու մարդիկ սպանելով: Այս բոլորով հանդերձ, պաղեստինցիները կը թաղէին իրենց մեռելներն ու կը շարունակէին պայքարը. ոչինչ կրնար վախցնել զիրենք ու կասեցնել իրենց պայքարը:
Վերջին առճակատումին, պաղեստինցիները հարիւրաւոր հրթիռներ արձակեցին Իսրայէլի վրայ: Իսրայէլի պատասխանը եղաւ ահարկու, օրեր շարունակ Կազայի երիզը իսրայէլեան հրետանիի ու կործանիչներու թիրախ դարձաւ, բազմայարկ շէնքեր հինայատակ քանդուեցան, աւելի քան 200 հոգի սպանուեցաւ, որոնց մէջ` 40 երեխայ եւ 29 կին, մինչ Իսրայէլ ունեցաւ միայն 12 զոհ:
Աշխարհի չորս կողմերէն դատապարտումներ տեղացին, սակայն որո՞ւ հոգը, Իսրայէլ կը շարունակէ իր վայրագ, ծաւալապաշտական ընթացքը, իսկ անկոտրում կամքով ու մահէն չվախցող պաղեստինցին ալ կը շարունակէ իր պայքարը: Իսրայէլ խոստացաւ Կազան «քարի դարին վերադարձնել…»: Արաբական պետութիւնները տեղերնէն չշարժեցան. ամէն բան վերջանալէ ետք, ՄԱԿ-ի ապահովութեան խորհուրդը նոր միայն մտածեց այս մասին ժողով գումարել. անօգուտ եւ անիմաստ ժողով: Հազար ամօթ աշխարհին: Ողջո՛յն հերոսական Պաղեստինին:
(ԱԶԳ, 21-5-2021)

LEAVE A REPLY

Please enter your comment!
Please enter your name here