Ատրպէյճանի Զինուած Ուժերուն Մէկ Մասը Հեռացած Է Հայաստանի Տարածքէն. ՊՆ

0
214

ԵՐԵՒԱՆ, «Արմէնփրէս».- Ատրպէյճանի զինուած ուժերուն կողմէ հայ-ատրպէյճանական սահմանին իրականացուած սադրանքներէն ետք ստեղծուած իրադրութիւնը, 23 Մայիսի կէսօրուան դրութեամբ, համեմատաբար կայուն է, դէպքեր չեն արձանագրուած: Այս մասին յայտնեցին Հայաստանի պաշտպանութեան նախարարութիւնը (ՊՆ)։

Նախարարութիւնը դիտել կու տայ, որ 22 Մայիսի երեկոյեան, Ատրպէյճանի զինուած ուժերու՝ Հայաստանի տարածքը ներթափանցած անձնակազմին մէկ մասը վերադարձած է ելման դիրքերը: Մամուլով շրջան ընող այն տեղեկութիւնը, թէ «Սիւնիքի մարզի Սեւ լիճին մօտ, առաւել քան 1000 ատրպէյճանցի զինուորականներ կան», չի համապատասխաներ իրականութեան:

Ըստ աղբիւրին՝ հայկական զինուած ուժերու ստորաբաժանումները բոլորովին կը վերահսկեն իրադրութեան` շարունակելով արգելափակուած պահել ատրպէյճանցի զինուորները:

Միւս կողմէ, Հայաստանի արտաքին գործոց նախարարութիւնը նաեւ մեկնաբանեց Եւրոպական խորհրդարանին կողմէ Ատրպէյճանի մէջ պահուող հայ գերիներուն վերաբերեալ բանաձեւի ընդունումը, որուն մէջ Եւրոպական խորհրդարանը յստակօրէն կը մատնանշէ, որ 12 Մայիսին՝ ներթափանցելով Հայաստանի տարածքը, Ատրպէյճան ոտնահարած է միջազգային իրաւունքը եւ Հայաստանի տարածքային ամբողջականութիւնը: Ըստ նախարարութեան՝ այս ծիրին մէջ յատկապէս մտահոգիչ որակուած են ատրպէյճանցի ներկայացուցիչներու, ներառեալ` նախագահի մակարդակով կատարուած յայտարարութիւնները, որոնց մէջ կը բարձրացուին տարածքային պահանջներ եւ ուժի կիրարկումի սպառնալիքներ, զորս Եւրոպական խորհրդարանը կ՛որակէ շրջանին մէջ անվտանգութեան ու կայունութեան ուղղուած ջանքերու վտանգում:

Նախարարութիւնը կը շեշտէ, որ Եւրոպական խորհրդարանին այս բանաձեւը անգամ մը եւս կը փաստէ, թէ ուժի կիրարկումով կարելի չէ լուծել ղարաբաղեան տագնապը եւ Արցախի ժողովուրդը զրկել իր անքակտելի իրաւունքներէն, այդ կարգին` ինքնորոշման իրաւունքէն:

LEAVE A REPLY

Please enter your comment!
Please enter your name here